Meclisa Jinan a Konfederasyona Sendîkayên Kedkarên Cemaweriyê (KESK) a Mêrdînê bi boneya 8’ê Adarê Roja Jinên Kedkar ên Cîhanê li navçeya Nisêbîn a Mêrdînê çalakiya “Zincîra Aştiyê ya Jinan” ava kir. Jinan ji bo balê bikişînin ser êrîşên Tirkiyeyê yên li ser Bakur û Rojhilatê Sûriyeyê li Parka Aştiyê ya Nisêbînê kom bûn û dirûşmên “Jin, jiyan, azadî”, “Bijî berxwedana jinan” û “Bijî berxwedana gelê Kurd” berz kirin. Jinan zincîr çêkirin û heta Deriyê Sînor ê Qamişloyê meşiyan. Jinên ku hatin ber têlên ser sînor li vir daxuyanî dan.
‘BANGA ABDULLAH OCALAN HÊVÎ GEŞ KIR’
Pêşî Hevseroka Giştî ya KESK’ê Ayfer Koçak axivî û diyar kir ku aştî xem û daxwaza herî mezin a jinan e û destnîşan kir ku têkoşîna jinan a aştiyê girîng e. Ayfer Koçak bal kişand ser banga dîrokî ya Rêber Apo û got, “Bi banga Birêz Ocalan re ne tenê li welatê me, ji bo gelên herêmê jî hêviyeke mezin a aştiyê derketiye holê.”
‘HEWL DIDIN TÊKOŞÎNA JINAN ASTENG BIKIN’
Piştre li ser navê Meclisa Jinan a KESK’ê ya Mêrdînê Sumeyra Ogur daxuyanî xwend, bal kişand ser nêzîkatiya li hemberî jinan û got, “Desthilata Tirkiyeyê bi polîtîkayên zextê yên li ser jinan û mûxalefeta civakî dimeşîne û ji rojnamegeran heta sendîkavan, ji siyasetmedaran heta parêzvanên mafên jinan gelek koman hedef digire. Hewl didin têkoşîna jinan a ji bo wekhevî û azadiyê bi binçavkirin, zext, sansur û darazê asteng bikin.”
Piştî daxuyaniyê jinan çalakiyên xwe yên 8’ê Adarê bi gerandina govendê berdewam kirin.
