Jinên Abya Yalayê li hemberî êrişên çeteyên HTŞ, DAÎŞ û dewleta Tirk ên li ser Rojavayê Kurdistanê daxuyaniyek weşandin.
Daxuyaniya bi sernavê “Bangawaziya Jinên Abya Yala ji bo parastina Rojava” bi vî rengî ye:
“Piştî bangawaziya seferberiyê ya gelê Rojava, me dît ku li çar aliyên cîhanê piştgiriya gelan û hêza jinê bajar û bajarok dagirtin.
Rojava bûye mînakeke xweseriyê li seranserê cîhanê. Şoreşa jinê, ji bo gelên li çar aliyên cîhanê têkoşînê didin, bûye mînaka berxwedan û domdariyê.
Ji bo gelên Abya Yala têkoşîna xwerêvebirin, têkoşîna jinê û têkoşîna axê, dînamîka sereke ya berxwedana gelan e.
Piştî bangawaziya gel û jinên Rojava, jinên ji herêmên cuda yên Abya Yalayê dengê xwe dikin yek da ku bigihîjin Rojhilata Navîn! Em piştî êrîşa li Helebê, li hember êrîşên cîhadî yên li ser axa Rojava, wekî jin dengê xwe bilind dikin! Em bang dikin ku êrîşên li ser Rojava bi dawî bibin! Em êrîşên li ser gelê Kurd ên qirkirinê, rejîma demkî ya Sûriyê, dewleta Tirk û çeteyên cîhadî yên HTŞ’ê berpirsyar digirin. Em berxwedana QSD û YPJ’ê silav dikin û xwedî lê derdikevin ku bi gelê rêxistinkirî bajar û gelan diparêze. Kobanê sembola berxwedaneye ku hemû gelên têkoşer ên li ser cîhanê temsîl dike.”
Di çarçoveya kampanyaya navneteweyî ya Women Defend Rojava de, jinên ji herêmên cuda yên Abya Yala dengê xwe di bin yek dirûşmê de kirin yek.
Ji Kolektîfa Las Kompas a Mexico City’ê, Mina bang li parastina Rojava kir û got ku ev êrîş ne tenê li dijî Rojava ye, êrîşeke gerdûnî ye li dijî hemû gelên cîhanê. Bang bi banga çalakiyê bi dawî bû.
Inti Barrios, endama Kolektîfa Las Kompas a Meksîkayê got ku piştevaniya gelê Meksîkayê bi berxwedan û cesareta gelê Rojava re bi biryardarî bidome.
Nûnerek ji Civakên Şoreşger ên Baweriyê yên Şîlî bang li piştevaniya parastina Rojava kir û ragihand ku jinên Şîlî bi jinên Rojava re mil bi mil dimeşin.
Valeria Becerra, endama Yaguel Lavkenche li axa Mapuche diyar kir ku êrîşa li ser gelê Kurd êrîşeke li dijî hemû gelên xwecihî yên cîhanê ye. Wê mafê xweparastinê yê gelê Kurd xwest û peyama piştevaniyê ji bo girtiyên siyasî yên Mapuche yên hîn ji aliyê dewleta Şîlî ve têne girtin şand.
Myriam Vargas, parêzvaneke Geliyê Cholulteca yê Meksîkayê jî got, ku ew ji herêmên gundewarî yên Meksîkayê tevlî kampanyaya piştgiriyê û çalakiyê ya ji bo parastina Rojava dibe.
Myriam Vargas bi dewamî got, “Êrîşên li ser Rojava, êrîşên li ser gelên me yên xwe ne. Em bi kampanyaya Women Defend Rojava re dibin yek, em tevlî dengê azadiya jinên Kurd dibin!
Rojava biparêzin, Kobanê biparêzin! Bi hemû piştgirî û hêza xwe!”
