Desteya Hiqûqî û Edaletê û Encûmana Edaletê ya Jinê ji bo ku mafê jinê di destûra nû ya Sûriyeyê de ji aliyê Hiqûqî de binirxînin, li bajarê Hesekê komxebat li dar xist. Jinên ku beşdarî komxebatê bûn ji JINHA’yê re axivîn.
Parêzer Beşîra Cemal Dîn jî bal kişand ser girîngiya sîstema Rêveberiya Xweser ku gelan ji qirkirin û talanê xelas kiriye û got: “Sîstema Rêveberiya Xweser sîstemeke serketî ye, tê de her ferd xwedî maf û nasname ye lewma di Sûriyeyê de gere ev sîstem mînak were dîtin. Em jinên Sûriyeyê yên resen destûra ku bê hebûna jinan were amadekirin qebûl nakin û rast nabînin. Xeta me ya sêyemîn e, azadiya jinan tê de esas e û bê rola jinan, Sûriye wê vegere serdema koletî û desthiltdariyê.”
Hevseroka Meclisa Gelan a Demokratîk Sîham Qeryo li ser girîngiya Hevpeymana Civakî axivî û got, “Ev hevpeyman mafên hemû pêkhate û jinan diparêze lewma pêwiste Hevpeymana Civakî esas û mînak were girtin da ku em Sûriyeya ne navendî û azad bidin avakirin.”
Parêzer Ferîha Omer jî pêvajoya Sûriye tê de derbas dibe wiha axinî ziman: “Ev pêvajoyek girîng e, lewma lidarxistina komxebateke bi vî rengî û bi pêşengiya jinan gaveke serketî ye, ji bo ku Sûriyeya azad, wekhev û adil bi nêrînên jinan were avakirin. Hebûna jinan di cihên biryardargirtinê de û hemû qadên din wê li Sûriyeyê zihniyetek azad û demokratîk misoger bike.”
