Li Wargeha Mexmûrê ji bo piştgirîdayîna pêngava Rêber Apo, bi pêşengtiya Tevgera Jinên Ciwan ên Mexmûrê (TJCM) meşek girseyî ya xwendevanên jin hat lidarxistin.
Meşê li ber dibistana Amadeyî ya Şehîd Koçerîn destpê kir û heta parka Şehîd Aryen Cûdî dewam kir. Di meşê de alên ku wêneyê Rêber Apo li ser bû û alên KJK hatin hilgirtin. Her wiha bê navber dirûşmeyên ‘Bijî Serok Apo’, ‘Jin Jiyan Azadî, azad bike Rêbertî’ û ‘Ciwan Fedayê Rêber Apo ne’ hatin qêrîn.
Piştî ku meş gihişt ber Parka Şehîd Aryen Cûdî, li wê derê daxuyaniyek ji aliyê Endama Tevgera Jinên Ciwan a Mexmûrê Roj Yildiztan ve hat xwendin.
Daxuyanî wiha ye:
“Em weke jinên ciwan ji bo azadiya fîzîkî ya Rêber Apo bang dikin.
Beriya 27 salan li dijî Rêber Apo komployek navnetewî pêk hat. Li beramberî komploya navnetewî hemû cîhan bêdeng man. Lê gelê Kurd û dostên wê li hemberî komploya navnetewî ev 27 salin bê navber di nava têkoşîn û çalakiyan de ne. Armanca kompogeran ew bû ku di kesayeta Rêber Apo de tevgera azadiyê û gelê Kurd tine bikin. Rêber Apo bi salane ji bo jiyanek azad, wekhev û demokratîk pêvajoyên aştiyê da destpêkirin. Lê ji aliyê dewletê ve ev pêvajo hatin xirabkirin. Herî dawî Rêber Apo bi banga ‘Aştî û Civaka Demokratîk’ pêvajoyek nû da destpêkirin. Bi vê bangê fikir û felsefeya Rêber Apo çawan gerdûnî bûye û belavî tevahî cîhanê bûye hat dîtin. Em weke jinên ciwan li banga Rêber Apo xwedî derdikevin, xwe li ser jiyana komînal birêxistin dikin. Heta ku ev pêvajo bi ser nekeve, azadiya gelan nayê bidestxistin. Ji aliyê tevgera azadiyê ve ji bo pêşxistina pêvajoya aştî û civaka demokratîk gavên girîng hatin avêtin. Asta pêvajoya aştî û civaka demokratîk gihiştiye qonaxa çareseriya hiqûqî. Ji aliyê dewleta Tirk ve tu gavên şênber ne hatiye avêtin. Komîsyona ku bi pêşniyara Rêbertî hatî avakirin ku biçe Rêber Apo guhdar bike, heta niha hewildanek pêşneketiye. Heta ku fîzîkî azadiya Rêber Apo pêkneyê, komplo, pergala êşkencê, qirkirin û tecrîdê jî wê berdewam bike.
Rêgezên hêviyê yek ji wan gava ye ku divê dewlet bavêje. Di sala 2024’an de, di meha Îlonê de DMME’yê ji bo mafê hêviyê salek dem da Tirkiyê. Li ruxmê ku salek di ser de derbaz bû jî ji aliyê dewleta Tirikiyê ve tu gav ne hatiye avêtin. Komîsyona Wezîran a Konseya Ewropayê di rûniştina xwe ya 15-17’ê Îlonê de dîsa bang li Tirkiyê kir ku bi lez gavên pêwîst bavêje û heta Hezîrana 2026’an agahiyan bide. Di vir de dîsa diyar dibe ku ji bo azadiya fîzîkî ya Rêber Apo ne ji aliyê Komîsyona Ewropa ve û ne jî ji aliyê dewleta Tirk ve tu gavên ber bi çav nayên avêtin. Bêyî azadiya fîzîkî ya Rêber Apo, aştî û azadî nayê herêmê û Rojhilata Navîn. Gelên ku dixwazin azad bijîn, divê xwedî li banga Rêber Apo derbikevin.”
Meş bi dirûşemyên ‘Bijî Serok Apo’, ‘Ciwan Fedayê Rêber Apo ne’ bi dawî bû.
