Li gelek deverên Rojhilata Navîn şer û pevçûn rû didin û li her çar parçeyên Kurdistanê êrîşên li dijî gelê Kurd berdewam dikin. Li hember van êrîşan bêdengiya saziyên navneteweyî bal dikişîne. Gel li dijî êrîşên sîstematîk ên li Îran, Heleb û Rojava xwepêşandanan li dar dixin.
Hevberdevkê Înîsiyatîfa Yekîtiya Demokratîk Mehmet Kamaç, diyar kir ku ev pêvajo ne tenê ji hêla leşkerî ve, di heman demê de ji hêla dîrokî û siyasî ve jî qonaxeke guherînê ye û bal kişand ser girîngiya jiyanî ya yekîtiya neteweyî ya Kurd li hember şerên desthilatdariyê yên herêmî û cîhanî.
Mehmet Kamaç, da zanîn ku krîzên piralî yên ku li cîhanê têne jiyîn, pergala siyasî û aborî ya navneteweyî aniye ber asta hilweşînê û got ku encamên herî giran ê vê krîzê li Rojhilata Navîn têne jiyîn. Kamaç, destnîşan kir ku pergala heyî bi Şerê Rûsya-Ukraynayê re bi bandor hilweşiyaye û got, “Em di demekê de dijîn ku aktorên bihêz bêsînor li dijî aliyên qels mudaxele dikin.”
‘HIQÛQÊN NAVNETEWEYÎ BI RENGEKÎ PRATÎKÎ BÊKÊR BÛNE’
Mehmet Kamaç, diyar kir ku êrîşên Îsraîlê yên li ser Xezeyê bi awayekî zelal hilweşîna pergala navneteweyî nîşan didin. Kamaç, destnîşan kir ku komkujiyên ku ji du salan zêdetir didome li ber çavên cîhanê diqewimin û got ku hiqûq, peyman û peymanên navneteweyî bi rengekî pratîkî bêkêr bûne.
Kamaç, her wiha diyar kir ku pergala aboriya cîhanî hilweşiyaye û bal kişand ser guhertinên bingehîn ên di rêyên bazirganiyê, zincîrên dabînkirinê û têkiliyên aborî de.
Kamaç, destnîşan kir ku şer û pevçûnên li Rojhilata Navîn domdar bûne û got pêvajoya ku ji Iraqê heta Sûriyeyê dirêj dibe, hîn jî berdewam dike. Kamaç, da xuyakirin ku tevî Kurd li Rojhilata Navîn xwedî nifûsek mezin in jî bê statu hatine hiştin û got ku îro pirsgirêka Kurd bi avahiya xwe ya dînamîk li her çar parçeyên Kurdistanê xwe ferz dike.
‘MIJARA HERÎ BINGEHÎN YEKÎTIYA NETEWEYÎ YA KURD E’
Mehmet Kamaç, anî ziman ku yekîtiya neteweyî hêmana herî bingehîn a çareserkirina pirsgirêka Kurd e û got ku siberoja Kurdan tenê bi kongreyeke neteweyî û yekîtiyeke hevpar dikare were misogerkirin. Kamaç, destnîşan kir ku rêya derketina ji vê krîzê avakirina yekîtiyeke li ser bingeha jiyana hevpar li Kurdistanê ye.
‘ÊRÎŞÊN LI HELEBÊ, LI DIJÎ TEVAHIYA GELÊ KURD E’
Mehmet Kamaç, destnîşan kir ku êrîşên li ser Helebê ne tenê hin tax hatine hedef girtin, di heman demê de hebûn û destketiyên Kurdan jî hedef hatine girtin. Kamaç got, “Divê em bi vê hişmendiyê re tevbigerin. Nêrînên me yên partî, îdeolojî û cîhanî çi dibe bila bibe, bi hev re tevgerîn berpirsyariyeke dîrokî ye. Serketina yekîtiya neteweyî ya Kurdan dê çarenûsa Rojhilata Navîn diyar bike.” Kamaç, got ku heta pirsgirêka Kurd li her çar parçeyên Kurdistanê neyên çareserkirin, li Rojhilata Navîn aştiyeke mayînde ne mimkûn e.
‘PARADIGMA CIVAKA DEMOKRATÎK MIFTEYA AŞTIYÊ YE’
Mehmet Kamaç, diyar kir ku bingeha aştiyê têgihîştina civakeke demokratîk e. Kamaç, anî ziman ku ev modela ku mafên her kesî esas digire û edalet û hiqûq esas tê girtin, bêyî diyalogê nayê avakirin. Kamaç, da xuyakirin ku pirsgirêka Kurd tenê bi Tirkiyeyê re ne sînordar e û got ku divê pirsgirêkên li her çar perçeyên Kurdistanê bi hev re werin nirxandin. Kamaç, diyar kir ku pêvajoya li Bakurê Kurdistanê girîng e lê têrê nake û got ku daxwazên Kurdên li Rojava, Rojhilat û Başûrê Kurdistanê jî beşek ji vê tevahî ne.
‘KONGREYA NETEWEYÎ WÊ JI BO GELÊN ROJHILATA NAVÎN MÎNAK BE’
Kamaç, girîngiya konferansa yekîtîyê ya li Qamîşloyê pêk hatibû bibîr xist û got ku ev konferans gaveke girîng ji bo pêkhatina kongreyeke neteweyî çêkiriye. Mehmet Kamaç, diyar kir ku Kongreya Neteweyî ya Kurd, ku bi beşdariya her çar perçeyên Kurdistanê were damezrandin, dê li ser bingeha civakeke demokratîk mînakek xurt a jiyana bi hev re ya aştiyane pêşkêşî gelên Rojhilata Navîn bike.
