Aktîvîstê siyasetê û rojnamevanê ji Hewlêrê Kawa Nadir got, “Ev pêvajo wê bandorê li hemû Kurdên li çar parçeyên Kurdistanê bike. Ji ber ku dewleta Tirk li dijî Kurdên li çar parçeyên Kurdistanê şer dike. Mesele ne tenê Bakurê Kurdistanê ye. Mesele Kurdistan bi temamî ye.”
‘EV PÊVAJO NAŞIBE PÊVAJOYÊN BERIYA NIHA’
Nadir diyar kir ku Pêvajoya Aştî û Civaka Demokratîk ji pêvajoyên beriya niha cudatir e, ji bo serketina aştiyê divê hemû alî bi berpirsyariyê rabin.
Kawa Nadir ragihand ku pêwîstiya pêvajoya aştiyê bi gavên bi wêrekî û du alî heye û got, “Di salên derbasbûyî de pêvajoya aştiyê dîsa bi gava Kurdan destpê kir, lê belê dewletê ji bo aştiyê îradeyeke xurt nîşan neda. Vê carê dewleta Tirk neçar ma ku gavekê biavêje, ji ber ku dewlet lawaz bûye. Pêvajoya Aştî û Civaka Demokratîk niha di rojevê de ye, lê belê şerê taybet ê dewlet Tirk ê li dijî Kurdan dewam dike. Bi heman rengî partiyên siyasî daxuyaniyên berevajî ruhê pêvajoyê didin. Birêz Ocalan her tim gotiye, ‘Ez bi dewletê re diaxivim, ne bi aliyan û partiyan re’. Ya ku divê ji bo aştiyê gavên biavêje dewlet e. Ji bo aştiyê wêrekî û hêz divê, ji bo vê jî gavên bi wêrekî şert e.”
‘KURDAN ÇEK JI BO PARASTINÊ Û AŞTIYÊ BI KAR ANÎN’
Kawa Nadir bal kişand ser gavên dîrokî yên ku gerîla ji bo Pêvajoya Aştî û Civaka Demokratîk avêtin û anî ziman ku pêvajo gelekî hesas e, lewma divê her kes bi baldarî tevbigere.
Nadir got, “Kurd bi navê aştiyê gelek caran hatin xapandin. Ji ber vê yekê jî divê di pêvajoya heyî de gelekî baldar bin.” Nadir bi dewamî got, “Sedema Kurdan a rahiştina çekê timî êrişên dijmin bûn. Kurdan çek ji bo parastinê û avakirina aştiyê bi kar anîn. Bêguman PKk tevgereke xurt û bi tecrûbe ye, ji bo pêvajoya aştiyê gaveke gelekî girîng û mezin avêtiye.”
Nadir diyar kir ku aştî hêsan nîne, bi kêrî hemû aliyan tê û anî ziman ku bêbaweriya ji dewleta Tirk dewam dike. Nadir got, “Ev pêvajo wê bandorê li hemû Kurdên li çar parçeyên Kurdistanê bike. Ji ber ku dewleta Tirk li dijî Kurdên li çar parçeyên Kurdistanê şer dike. Mesele ne tenê Bakurê Kurdistanê ye, Kurdistan bi temamî ye.”
‘PÊVAJOYA AŞTIYÊ JI BO TIRKIYEYÊ MECBÛRIYETEK E’
Di dewama axaftina xwe de Kawa Nadir careke din diyar kir ku Tirkiye ketiye nava pêvajoyeke cidî ya krîzê, pêvajoya aştiyê ji bo Tirkiyeyê veguheriye mecbûriyetekê û got, “Tirkiye xwe weke nûnerê hemû Misilmanan dibîne û dixwaze bibe hêza herî mezin a herêmê.” Nadir got, “Ji bo karibe li Rojhilata Navîn bibe delweteke aram û xurt, Tirkiye divê destpêkê pirsgirêkên navxweyî çareser bike. Ya sereke jî pirsgirêka Kurd e. Eger pêvajoya aştiyê bi ser nekeve, dibe ku Tirkiye bi hilweşîneke cidî re rû bi rû bimîne.”
‘BIRÊZ OCALAN RÊBEREKÎ BÊHEMPA YE’
Kawa Nadir destnîşan kir ku Rêber Apo ji bo gelê Kurd bi roleke dîrokî radibe, ew Rêber Apo ji nêz ve nas dike, Rêberekî bêhempa ye û got, “Dema ku cara destpêkê min Birêz Ocalan dît, min fêhm kir ku naşibe Rêberekî din.” Nadir axaftina xwe bi vî rengî dewam kir: “Ew ne tenê Rêberekî siyasî ye, di heman demê de fîzolofek e. Kêmasiya bi salan a li Kurdistanê ya ji aliyê Rêbertî û siyasî ve, bi hewldanên Ocalan ji holê hate rakirin. Di bingeha tirsa ji hêza Kurdan a li Bakurê Kurdistanê de îdeolojiya Birêz Ocalan heye. Kadroyên PKK’ê xurt in. Birêz Ocalan hatibe girtin jî her gerîlayekî PKK’ê bi fikrên wî veguherîn pêşengekî.”
Di dawiya axaftina xwe de Kawa Nadir destnîşan kir ku divê gavên şênber û qanûnî bêne avêtin û got, “Divê azadiya fîzîkî ya Rêber Apo pêk were.”
