Konseya Giştî ya Tevgera Şoreşger a Yekbûyî ya Jinan (KBDH), diyar kir ku ew di demeke ku şîdeta mêran a ji hêla kapîtalîzma baviksalar ve di her warî de jinan dorpêç dike de derbas dibin û destnîşan kir ku jin rastî cûreyên cuda yên şîdeta mêr-dewletê tên û tên kuştin.
ÇETEYAN BI HEZARAN JIN HEDEF GIRTIN
KBDH’ê, diyar kir ku hêzên wekî DYE, NATO, Îsraîl û Tirkiye li Rojhilata Navîn gelan ber bi karesateke mezin ve dibin û hat gotin ku di şeran de bi taybetî jin dibin hedef. Hate ragihandin, ku di êrîşên ku Îsraîlê li Xezeyê û ji hêla HTŞ’û SMO’yê ve li deverên cuda yên Sûriyeyê pêk anîne de jin hatine revandin, tecawizkirin û kuştin. KBDH’ê, destnîşan kir ku êrîşên mîna yên ku DAÎŞ’ê 11 sal berê li dijî jinên Êzidî pêk anî hîn jî berdewam dikin.
KBDH’ê diyar kir ku Şoreşa Rojava bi têkoşîna azadiya jinan ve hatiye naskirin, ji ber vê yekê ji aliyê hêzên emperyalîst û herêmî ve hatiye hedefgirtin. Her wiha hat diyarkirin ku zexta li ser jinan ji aliyê desthilatdariya AKP-MHP ve ne tenê li Rojhilata Navîn, di heman demê de li Tirkiyeyê jî berdewam dike, destkeftiyên jinan desteser dike û mafên wan bi Peymana Stenbolê ji holê radike.
KBDH’ê, da zanîn ku desthilatdariya mêr bi polîtîkayên xwe yên dijminê jinan hêrsa mêran gur dike, kuştina jinan teşwîq dike û di heman demê de bêcezatî û biryarên tên dayîn yên sembolîk piştgiriyê didin vê pêkanînê. Hate destnîşan kirin ku şîdeta li dijî jinan bi rêya medyayê tê rewakirin û hat gotin ku dadgerî, li gorî xeta dewleta mêr nikare jinan biparêze.
Di daxuyaniya KBDH’ê de, hate destnîşankirin ku desthilatdariya AKP-MHP’ê bi polîtîkayên qeyûm, binçavkirinan, zextên li ser jinên şoreşger li girtîgehan û şîdeta zayendî armanc dike ku têkoşîna jinan bitepisîne û hat gotin ku ev êrîş parçeyek ji bi polîtîkayên li dijî komên din ên bindest in.
EM BERXWEDAN Û SERHILDANA XWE BERFIREH BIKIN
KBDH’ê, da zanîn ku têkoşîna jinan li dijî kapîtalîzma baviksalar li çaraliyê cîhanê xurt bûye û banga berfirehkirina berxwedanê kir. KBDH’ê, da xuyakirin divê hêrsa ku di her kuştin, êşkence û zilma ku jin pê re rû bi rû dibin mezin bibe veguhere serhildanê û hat diyar kirin ku ew ê hesab ji sûcdar û avaniyên ku wan diparêzin bipirsin.
KBDH’ê, da zanîn ku li dijî van êrîşan rizgarî, bi berfirehkirina têkoşîna yekgirtî û milîtanî ya jinan pêkan e; ji bo jiyanê berxwedan rêya jêneveger e û hat gotin divê rêya têkoşînê bi deverên heyî re neyê sînordarkirin û li her deverê bê berfirehkirin.
Di dawiyê de KBDH’ê got, “Têkoşînên azadiya jinan û femînîstên sosyalîst ne tenê wêrekiya li dijî pergala serdest a mêran didin jinan, di heman demê de biryardariya guhertina cîhanê, berxwedana li dijî faşîzmê û hilweşandina pergala îstismarê ya kapîtalîst jî xurt dikin.”
