KCDK-E di daxuyaniya xwe ya nivîskî de got, “20’emîn Festîvala Jinan a Zîlan, ku her sal li Ewropayê tê lidarxistin, di 20’ê Hezîrana 2026’an de li bajarê Dortmundê yê Elmanyayê dê pêk were. Ev festîvala ku bi pêşengiya Meclîsên Jinan ên wek Roza, Sara û Amara hatî amadekirin, ne tenê şahiya çandî ye, her wiha platformeke xurt a yekîtî û rêxistinbûna jinên Kurd li Ewropayê ye. Tê plankirin ku ji Belçîka, Hollanda û welatên derdorê bi rengekî xurt tevlîbûn çêbibin. Festîval bi muzîka kevneşopî, pêşandan û axaftinan bang li hemû jin û ciwanan dike ku li hev bicivin.”
Di daxuyaniyê de her wiha ev tişt hatin gotin, “Ev festîval navê xwe ji Zeynep Kinaci (Zîlan) ku di 30’ê Hezîrana 1996’an de bi çalakiya xwe ya fedaî bû sembola azadiya gelê Kurd, digire. Em bi bîranîna berxwedana wê û hemû jinên ku di têkoşîna li dijî pergala baviksalar a hezarsalan de canê xwe feda kirine, sozê jiyana azad nû dikin. Ji Zîlan heta Bêrîtan, ji Sarya heta Roşana, bi xebat, hizir û berxwedana pêşengên jinan, têkoşîna azadiya jinan gihiştiye asteke şoreşa jinan. Em bi hurmetî hemû şehîdên jin, bi taybetî Şehîd Zîlan bi bîr tînin û soza pêkanîna xeyalên wan dubare dikin.”
KCDK-E daxuyaniya xwe bi van gotinan domand, “Em bi hest û bêrîkirinê Rêber Apo ku gelê Kurd vejand û tovên jiyana azad bi rengê jinan çand silav dikin. Divê em ji bîr nekin ku asta azadiya civakekê bi asta azadiya jinê tê diyarkirin.
Îro jinên cîhanê dibînin ku şoreşa jinan a ku bi dirûşmeya ‘Jin, Jiyan, Azadî’ bilind bûye, pêşengiya têkoşîna demokrasî, ekolojî û azadiyê dike. Li Kurdistanê bi têkoşîna rêxistinkirî ya jinan jiyana azad tê avakirin. Parastin û mezinkirina vê têkoşînê peywireke dîrokî ya me hemûyan e.
Weke KCDK-E em bang li hemû jinan, ciwanan û berxwedêrên azadiyê dikin ku di 20’ê Hezîranê de li Dortmundê di ronahiya Zîlan de li hev kom bibin.”
