Koordînasyona Civaka Êzidî ya li Ewropayê (KCÊ-E) bi navê saziyên civaka Êzidî yên li Ewropayê Çarşema Serê Nîsanê li Êzidiyên li welêt û tevahiya cîhanê, li gelê Kurdistanê û tevahiya mirovahiyê pîroz kir.
Di peyamê de hate ragihandin ku Cejna Çarşema Serê Nîsanê, bi navên “Cejna Sersalê“, “Cejna Tawisî Melek“, “Bûka Salê“ û “Roja Afirandina Cîhanê“ jî tê naskirin û hate gotin, “Ev cejn, cejna civaka Êzîdî ya herî mezin û watedar e ji dîroka qedîm ve tê pîrozkirin. Cejna ‘Çarşema serê Nîsanê’ li gorî bîr û baweriyên civaka me, roja afirandina cîhanê, peydabûna xêr û bereketa axê ye. Çarşema Serê Nîsanê destpêka aştî û aramiyê ye. Xweza reng diguhere di wê demê de.”
Peyama KCÊ-E’yê bi vî rengî dewam kir:
“Li gorî mîtolojî û baweriya Êzîdiyan berê cîhan hemû av bû. Bi diharbûna miliyaketên Xwedê re cîhan tê meyandin. Wê rojê Tawisî Melek ji ezmana dihar û nazilî erdê bûye. Lewma jî li gelek deveran wekî cejna Tawisî Melek tê pîrozkirin. Di vê cejnê de, basimbar (ji benê bi rengê kesk û sor û zer) tê çêkirin. Wateya basimbar xêr, bereket, pêṣîlêgirtina qeda û bela ye. Basimbar li destê jin, mêr, qîz, zarokan, zada, her tiṣtekî pîroz û navdar ve tê girêdan. Meha Nîsanê, hem destpêka şînbûna xweza ye û hem jî bûka salê ye.Di vê cejnê de, baqên kûlîlkên rengê reng ji xemla Nîsanê bi her ciyekî pêwist û girîng ve têne daliqandin.Disa, di meha Nîsanê de Êzîdî bûka dernaxin, jiber ku meha Nîsanê bi xwe bûka Salê ye. Cejna Çarşema Serê Nisanê di heman demê de xemla çanda kurdî û baweriya me ye.”
Koordînasyona Civaka Êzidî ya li Ewropayê ev bang kir:
“Êzidiyên dilsoz; girîng e ev çanda qedîm ji aliyê civaka me ve were parastin. Pêwîste em weke civak û saziyê wê di vê têgihiştin û zanistiyê de bin, çanda me û baweriya me di bin xeteriyeke mezin de ye. Divê em li nirxên xwe xwedî dernekevin û çarenûsa xwe bi destê xwe binivsînin. Bi taybetî pêwiste civaka Êzidî li peyama Rêber Apo ya ji bo civak Êzidî û Manîfestoya Aştî û Civaka Demokratik xwedî derkevin û pêşengtiyê ji vê pêvajoyê re bikin. Divê ji bo nasandin û parastina bawerî û çanda Êzdatiyê civaka me bi ruhê seferberiyê li erkê xwe xwedî derkeve û li ser bingeha civaka demokratik xwe bi rêxistin bike. Dîsa girîng e em weke civaka Êzîdî û saziyê wê li ku derê dibe bila bibe em tekoşîna xwe bilindtir bikin, yekitiya xwe çêkin.”
Peyam bi vê hêvî û bendewariyê bi dawî bû:
“Em hêvîdar in û bangawaziyê li tevahiya gelê xwe û dostên civaka me dikin, ku bi girseyî tevlî pirozbahiyê Cejna Çarṣema Serê Nîsanê bibin. Bi van bîr û baweriya em cardin cejna Çarşema Serê Nîsanê li civaka Êzidî, li gelê Kurdistanê û li tevahiya mirovahiyê pîroz dikin.”
