Daxuyaniya Hevserokatiya Konseya Rêveber a KCK’ê bi vî rengî ye:
“Meha Gulanê ji bo gelê Kurd meha şehîdan e, 18’ê Gulanê jî roja şehîdan e. Di şexsê şehîdên meha Gulanê de em şehîdan hemûyan bi minet û bi hurmet bi bîr tînin.
Bi taybetî 100 sal in êriş li hebûna Kurdan tê kirin, lewma li çar parçeyên Kurdistanê Kurd ji bo hebûnê têdikoşin. Di nava vê têkoşînê de bi sed hezaran şehîd hatin dayin. Eger îro li çar parçeyên Kurdistanê hîn jî têkoşîna azadiyê bi rê ve diçe, yên ku ev pêk anîn şehîd in. Lewma bîranîna şehîdan, qîmet û watedayina li şehîdan ji bo Kurdan hişê hebûnê ye. Gelê Kurd tenê bi vî hişî dikare hebe û ji bo jiyaneke azad têbikoşe.
Rêber Apo, PKK û Tevgera Azadiyê ya Kurd bi vê wateyê nêzî şehîdan bûn û kirin ku gelê Kurd di têkoşîna hebûn û azadiyê de pêşketinên mezin pêk bîne. Watedayina ji bo şehîdan kir ku têkoşîna azadiyê ya Kurdan û gelê Kurd bigihîne wê astê ku têk neçe. Heta ku ev watedayin û dilsoziya bi şehîdan re dewam bike gelê Kurd û Tevgera Azadiyê wê her cûre êrişan bişikîne û teqez bi ser bikeve. Şehîd ji bo me doh, îro û siberoja me ne. Ji ber vê jî bîranîn û fêhmkirina şehîdan ji bo gelê Kurd mijareke hebûnê û jiyana azad e.
Rêber Apo li hemberî darvekirina Denîz, Yûsûf û Huseyînan soza têkoşînê da. Bi avakirina PKK’ê bersiv da şehadeta Hakî Karer û têkoşîna xweparastinê ava kir. Ji bo şehîdên heta niha yên dîroka Kurdistanê biryar li ser têkoşîna pêkanîna welatekî azad û afirandina jiyaneke azad da.
Xala esasî ya ku Rêber Apo dike şoreşgerê herî mezin ew e ku parêzvan û berdevkê şehîdan e. Rêber Apo got; ez ê nehêlim hesreta şehîdan bê binpêkirin, têkoşîn wê teqez li ser xeta şehîdan bimeşe û bi pêş bikeve. Dilsoziya bi şehîdan re weke israra li ser têkoşînê û meşa li ser xeta têkoşîna serketî nirxand.
Rêber Apo bi gotina ‘PKK partiya şehîdan e’ cihê şehîdan ê li nava têkoşînê bi şênberî diyar kir. Niha jî PKK wê weke rastiya şehîdan û nirxên ku şehîdan afirandine her tim bijî. Hêzeke bi vî rengî ya rastiya şehadetê heye.
Bêguman di meha şehîdan de em Hakî Karer, Îbrahîm Kaypakkaya, Ferhat Kûrtay, Necmî Oner, Mahmût Zengîn, Eşref Anyik, Halîl Çavgûn, Mehmet Karasûngûr, Îbrahîm Bîlgîn, Denîz Gezmîş, Sînan Cemgîl, Şîrîn Elemhûlî, Abdulkadîr Çûbûkçû, Azad Sîser, Çekdar Amed, Kasim Engîn, Masîro Botan, Celal Başlangiç, Sirri Sureyya Onder, Sabrî Tendurek û bi hezaran şehîdên xwe bi bîr tînin û soza xwe dubare dikin ku hesreta wan pêk bînin.
Lê belê weke kadro, tevger û gel em ê di vê meha şehîdan de kêmasiyên xwe yên di têkoşînê de bibînin, berê xwe bidin têkoşîneke hîn bi bandor û ev yek wê bibe dilsoziya me ya herî mezin a bi şehîdan re. Wan di nava têkoşînê de xwe dan pêş. Wê demê divê em jî bi pêşengiya wan têkoşîneke hîn xurt bimeşînin.
Di afirandina hemû nirxan de rola rastiya şehadetê diyarker e. Gelê Kurd bi têkoşîna xwe ya azadiyê nirxên mezin afirand. Divê êdî ew têkoşîn bê meşandin ku van nirxan bi şêweyê bicihanîna jiyana azad bibe serî. Ev yek jî li ser xeta şehîdan û bi têkoşîna bi sekna wan dibe.
Berpirsyariyeke dîrokî ye ku di vê meh û roja şehîdan de ev hemû rastî bêne zanîn û li ser vê bingehê têkoşîn bê meşandin.
Şehîdên me bi dilsoziya li ser xeta Rêber Apo têkoşîn bi pêş ve birin. Sekn, helwest û pîvanên wan sekn, helwest û pîvana Rêber Apo bû. Bi vî rengî wan xeta azadiyê bi awayê herî baş temsîl kirin. Divê em vê sekna wan ji xwe re bikin mînak û weke tevger û gel li ser xeta Rêbertî bimeşin û bi ser bikevin.
Rêber Apo projeya aştî û civaka demokratîk danî holê. Rêber Apo ku parêzvan û berdevkê herî rast ê şehîdan e, ev proje û xeta wî di heman demê de banga şehîdên me ye. Dema ku em ji vê bangê re bûn bersiv û projeya civaka demokratîk bi ser xist, hingî em ê hesreta şehîdên xwe pêk bînin.”
