Komeleya Mafên Mirovan (ÎHD) ji sala 1995’an û vir ve her sal dem navbera 17-31’ê Gulanê weke Hefteya Windayan bi bîr tîne. Bi vê yekê tê xwestin ku rûbirûbûn bi rastiya windayên di binê çavan de yên li Tirkiye û cîhanê bê kirin, aqûbeta windayan bê lêkolîn û berpirsyar bêne darizandin.
Bi vê wesîleyê li gel çalakiyên rûniştinê yên Dayikên Şemiyê, xizmên windayan û parêzvanên mafên mirovan ên ji 27’ê Gulana 1995’an û vir ve bi rêk û pêk kirine, di serî de li pêşiya Lîseya Galatasasray a Beyoglû ya Stenbolê li Amed, Êlih, Şirnex, Colemêrg, Dersim, Îzmîr, Enqere, Edene, Mersîn û Wanê işaret bi rastiya windayan tê kirin.
Komîsyona Mafên Mirovan û Hiqûqê ya DEM Partiyê bi wesîleya Hefteya Windayan daxuyaniyek da û bang li desthilatdariya siyasî ya li Tirkiyeyê kir.
Di daxuyaniyê de hate xwestin ku Tirkiye bibe aliyekî Peymana Navneteweyî ya Têkildarî Parastina li dijî Windakirina bi Zorê ya Neteweyên Yekbûyî, Protokolên Peymana Cenevreyê qebûl bike û erka darizandinê ya Dadgeha Ceza ya Navneteweyî qebûl bike.
DEM Partiyê destnîşan kir ku di Qanûna Ceza ya Tirk de windakirina bi zorê weke sûcê li dijî mirovahiyê bi eşkere bê destnîşankirin û bi qanûnê bê gotin, sûcên li dijî mirovahiyê li ber dembihurînê nakeve û ev hikum ji bo demên bihurî jî di nava xwe de bihewîne.
Hate ragihandin ku ji bo lêkolînkirina aqûbeta windayan û eşkerekirina berpirsyaran komîsyona heqîqetê bê avakirin.
Di dawiya daxuyaniyê de bi wesîleya Hefteya Windayan hate xwestin ku karê ji bo rûbirûbûna bi rastiya windayên di binê çavan de bê destpêkirin û hate gotin, ev yek wê di avakirina aştî û civaka demokatîk de bibe gaveke girîng.
