Komîteya Gel û Baweriyan a KCK’ê bi wesîleya Cejna Remezanê daxuyaniyek weşand. Komîteyê hêviya aştî, xwişk-biratî, azadî, edalet û wekheviyê kir. Daxuyanî bi vî rengî ye:
“Em hêvî dikin ku Cejna Remezanê ya 2026’an bibe wesîleya aştî, xwişk-biratî, azadî, edalet û wekheviyê ku pêwîstiya mirovahiyê pê heye û tevkariyê li têkoşîna ji bo jiyana cîhaneke wekhev, azad û demokratîk bike. Di serî de ji bo Misilmanên Kurdistanî em cejna wan Misilmanan pîroz dikin ku ji bo tevahiya mirovahiyê başiyê, rastiyê dixwazin, ji bo her kesî daxwaza maf û edaletê dikin.
Em di pêvajoyeke welê de ne ku ji bo gelên Rojhilata Navîn gelekî xetere û krîtîk e. Cografya me ku hêzên derve yên serwer hewl didin di asteke girîng de rolê bi dest bixe, zêdeyî 30 sal in bûye qada şerê mezin. Ev pêvajoya ku weke Şerê Cîhanê yê Sêyemîn tê binavkirin, bi hesabên hîn bêhtir hêz, hîn bêhtir çeperên qewîn û kêrhatî, hîn bêhtir çavkaniyên aboriyê, hîn bêhtir serweriya li ser hêzên leşkerî û siyasî tê meşandin. Şerê parvekirina hêzê ya salên dawî li ser çavkaniyên enerjiyê û rêyên bazirganiyê hatin kirin, destwerdana li herêmê bêhtir bi lez kir. Stratejiya bingehîn a hêzên hegemonîk ên ku dixwazin li qadê serwer bin parçe bû, Rojhilata Navîn a welê tê afirandin ku bi şerê navxweyî mijûl bibe, gel û baawerî li hemberî hev şer bikin. Ji ber vê yekê şerê ku Îsraîlê bi hincetnîşandana Hamasê li Xezeyê da destpêkirin, li seranserê Rojhilata Navîn hate belavkirin û dewam dike. Di bingeha rastiya êrişên li ser Sûriye û Îranê de ev nêzîkatiya stratejîk heye. Di rewşeke bi vî rengî de ji ber şer pirsgirêkên gelên Rojhilata Navîn mezin dibe. Koçberî û xizanî dibin sedem ku pirsgirêkên civakî kûrtir bibin. Birêxistinkirina civakên Rojhilata Navîn li ser bingeha neteweya demokratîk hem wê pêşî li şer bigire û pirsgirêkên civakî çareser bike, hem jî bi pêkanîna aştiya herêmê wê pêşî li jiyaneke berhemdar û aram veke. Lewma bi wesîleya Cejna Remezanê em bang li gelên Ereb, Fars, Tirkan û hemû gelên Misilman û gelan dikin ku yekîtiya demokratîk xurt bikin û di nava xwişk-biratiyê de tevbigerin.
Di vê serdemê de pêwîstiya herî mezin a alema Îslamê aştiya herêmê ye. Bi vê wesîleyê em bang li Misilmanên li Rojhilata Navîn dikin ku li dora nirxên demokratîk ku Îslam temsîliyeta wê dike bibin yek, ji bo berjewendiyên gelên li Rojhilata Navîn civaka demokratîk ava bikin. Li hemberî hêzên ku di oxira berjewendiyên xwe de bi hemû nirxên mirovahiyê dilîzin bibin yek, tevlî karên afirandina yekîtiya demokratîk a gelan û avakirina civaka demokratîk bibin.
Kurdistaniyên hêja, em îsal Cejna Remezanê û Cejna Newrozê bi hev re pêşwazî dikin. Cejna Newrozê ku Kkurd weke sala nû pêşwazî dikin di serî de li Kurdan, li her kesî pîroz dikin. Em hêvî dikin ku Newroza îsal ji bo gelên Rojhilata Navîn bibe wesîleya avakirina sîstema di çarçoveya neteweya demokratîk de û bang li her kesî dikin ku yekîtiya demokratîk a gelên Rojhilata Navîn bi rêxistin bikin, jiyaneke xwişk-biratiyê biafirînin, tevkariyê li avakirina aştî û civaka demokratîk bikin.
Di cejna îsal de em dixwazin bi bîr bixînin ku divê ji her salê bêhtir em xwedî li şehîdên xwe derkevin, bi komên girseyî yên gel serdana şehîdgehan bikin. Em dixwazin cejna malbatên şehîdan û girtiyan bi taybetî pîroz bikin. Em bang dikin ku bi meşandina bi xurtî ya avakirina civaka demokratîk bersiv ji bîranîna şehîdan re bê dayin. Divê ji her demê bêhtir piştgirî ji malbatên şehîd û girtiyan re bê dayin, destê alîkariyê dirêjî mirovên nexweş û hewcedar bikin û piştgiriya wan bikin.
Weke gel em herdu cejnan îsal bi berxwedaneke dîrokî pêşwazî dikin. Weke ku em her carê bi bîr dixin, berxwedana ji bo azadî, wekhevî, maf û edaletê bi qasî îbadetê bi wate, hêja û xêr e. Em dixwazin vê yekê careke din bînin ziman. Hêzên serwer, mêtinger û qirker bi sedan salan ji parçebûna gelên Rojhilata Navîn û Kurdan hêz wergirtin û hebûna xwe pêk anîn. Bi bikaranîna gelên Rojhilata Navîn a li hemberî hev, bi bikaranîna Kurdan a li hemberî hev polîtîkaya xwe ya Rojhilata Navîn û Kurd ava kirin. Polîtîkayên ku afirandin polîtîkayên qirkirinê ne. Yekane rêya beralîkirina êrişên qirkirinê ji bo gelên Rojhilata Navîn û Kurdan rêxistinbûna xwe ya li ser xeta neteweya demokratîk e, avakirina yekîtiya xwe ya demokratîk e. Pêwîstiya gelên Rojhilata Navîn herî zêde bi demokrasiyê heye. Li Rojhilata Navîn gelê ku ji aliyê demokratîkbûnê ve dikare pêşketinan biafirîne gelê Kurd e. Kurd bi paradîgmaya neteweya demokratîk xwedî perspektîfeke gelekî xurt e ku rewşa xitimandî ya Rojhilata Navîn ji holê rake û tarîtiyê ronî bike. Lê belê ji bo vê jî beriya her tiştî divê Kurd di nava xwe de yekîtiya xwe ya demokratîk pêk bînin. Lewma alim, seyda û meleyên Kurdistanî li ser bingeha Yekîtiya Kurd a Demokratîk divê hîn bêhtir bixebitin, li dijî îstîsmarkarên olî û mezhebperestan ji bo bilindkirina têkoşînê divê bi rola xwe ya dîrokî rabin.
Li ser vê bingehê em Cejna Remezanê di serî de li gelê Kurd, li gelên Misilman hemûyan, li Misilmanên antî kapîtalîst û demokratîk, li gelên Rojhilata Navîn pîroz dikin. Em hêviya xw eya ji bo edalet, aştî, yekîtî, xwişk-biratî û azadiyê ya ji bo gelan dubare dikin.”
