Di daxuyaniya KCK’ê de hate ragihandin ku pîrozbahiyên li çar parçeyên Kurdistanê, gelek bajarên Tirkiyeyê, derveyî welat û Herêmên Parastinê yên Medyayê li hişê mirovan neqişîn û dîmenê derkete holê xwedî wateyeke dîrokî bû.
Daxuyaniya KCK’ê bi vî rengî ye:
“Ji gelê me û raya giştî re!
Newroz ku bi hezaran sal in di serî de Kurd ji aliyê gelên Rojhilata Navîn ve weke ‘Cejna Vejîn, Berxwedan û Biharê’ tê pîrozkirin, îsal bi dirûşma ‘Azadî ji Rêber Apo re, Yekîtiya Demokratîk a Kurd’ li her devera Kurdistanê, derveyî welat, gelek navendên Tirkiyeyê û li Herêmên Parastinê yên Medyayê bi coşeke mezin hate pîrozkirin û hîn jî tê pîrozkirin. Coşa mezin, asta tevlîbûna girseyî û peyamên dîrokî yên di vê Newrozê de hatin dayin, ji niha ve li hişê mirovan neqişî ne.
Newroz ku sembola roja rizgariya gelê Kurd û gelên Rojhilata Navîn ji zilmê ye, bi Pêvajoya Aştî û Civaka Demokratîk re nû bû ku pêvjao ji aliyê Rêber Apo ve hate destpêkirin û armanca xwe jiyaneke bi hev re ya gelan a li ser bingeha wekhevî û azadiyê ye. Bi vê têgihiştinê, di Newroza 2026’an de gelê Kurd û gelên me bi dehan milyon kesî bi rengê herî xurt xwedî li Pêvajoya Aştî û Civaka Demokratîk derketin, nîşan dan ku çawa li dora mîmarê pêvajoyê Rêber Apo dicivin. Gelê me li her qada Newrozê bi rengê herî xurt daxwaza azadiya fîzîkî ya Rêber Apo kir.
Jinên ku piştî 8’ê Adarê pêşengî ji Newrozê re kirin, ciwan, gelê Kurd, gerîlayên azadiyê yên Kurdistanê nîşan dan ku ew dixwazin Rêber Apo êdî bi rengekî azad di nava xwe de bibînin, nema dikarin xwe li dîlgirtina Rêber Apo rabigirin û têkiliya xwe ya qewîn û xurt a bi Rêber Apo re careke din nîşanî her kesî dan.
Gelê me ku bi ronahiya Rêber Apo zane bû, careke din raxist pêş çavan ku ji bo yekîtiya demokratîk a Kurdan amade ye û bang li rêxistinên siyasî yên Kurd kir ku li hemberî xeteriyan tavilê yekîtiya xwe ya demokratîk ava bikin.
Gelê me di vê Newrozê de xwe gihand Manîfestoya Civaka Komînal a Demokratîk, ev manîfesto bi kelecaneke mezin pêşwazî kir û nîşan da ku ji wezîfeyên avakirina civaka demokratîk re amade ye.
Gerîlayên Azadiyê yên Kurdistanê li Herêmên Parastinê yên Medyayê bi coş, kêfxweşî û îradeyeke mezin Newroz pîroz kirin û destnîşan kir ku ji bo serxistina her cûre wezîfeyên vê pêvajoyê ew amade û bi biryar e.
Eşkere ye ku Newroza 2026’na gaveke gelekî mezin bi Pêvajoya Aştî û Civaka Demokratîk re da avêtin, yên ku hesabên şaş dikin hişyar kir û hêzeke mezin a têkoşerên demokrasî û azadiyê.
Bi vê wesîleyê em spasiya her kesî dikin ên ku ked dan Newroza 2026’an a bi heybet, em careke din Newrozê li Rêber Apo, şehîdên xwe yên leheng, jin, ciwan, gelê me û gelan hemûyan pîroz dikin.
Bijî Newroz!”
