Hevserokatiya Konseya Rêveber a KCK’ê ji ber wefata Serokdewletê Vatîkanê Papa Francis peyameke sersaxiyê weşand.
Di daxuyaniyê de hate gotin, “Em bi xemgîniyeke mezin pê hesiyan ku lîderê rûhanî yê cîhana Katolîk û Serokdewletê Vatîkanê Papa Francis wefat kiriye.”
Daxuyaniyê bi vî rengî dewam kir:
“Papa Francis ku ji gelê Arjantînê bû, her tim gelparêz bû. Lewma wefata Papa Francis ji bo mirovahiyê windahiyeke mezin e. Papa Francis di nava 12 salên dema xwe ya Papa de mohra xwe danî binê gelek serketinan. Li hemberî şerê berjewendiyan ê qirker ku modernîteya kapîtalîst li ser herêmên cuda ferz dikir, Papa Francis her tim helwesteke şênber nîşan da. Li Vatîkanê mohra xwe danî binê reformên girîng, di serî de Kurdistan û Rojhilata Navîn serdana gelek deverên cuda yên cîhanê kir, pêşvebirina têkiliya navbera ol û gelan teşwîq kir û li ser vê bingehê bi navê mirovahiyê bi roleke hevgirtinê rabû. Papa Francis her tim bi rûkeniya xwe bi ‘Şoreşa Merhametê’ bû dengê aştî, hezkirin û dilovaniyê. Papa Francis bi bindestan û mexdûran re bû û girîngî dida jin û ciwanan.
Papa Francis di dema Cejna Paskalyayê de wefat kir, lewma xwedî qîmet û wateyeke hîn manewî û rûhanî ye. Ji ber wefata wî bila serê cîhana Katolîk, hemû Xiristiyanên li cîhanê, dewleta Vatîkanê, malbat û hezkiriyên wî, şopdarên wî, her kesên ji bo peyama wî ya başî û mirovahiyê li cîhanê belav bikin hewl didin, sax be. Bila ruhê Papa Francis şad be.”
