Komeleya Mafên Mirovan (ÎHD) diyar kir ku Abdulkadîr Tatli yê ku di lîsteya nexweşan de cih digirt, li Gîrtîgeha Tîpa F a Kirikkaleyê jiyana xwe ji dest daye.
Hate ragihandin ku Abdulkadîr Tatli yê ku di sala 1999’an de rehîn hate girtin, ev demeke dirêj bû tedawî dibû. Cenazeyê Tatli ji bo otopsiyê birin Nexweşxaneya Dewletê ya Kirikaleyê. Hate ragihandin ku piştî otopsiyê wê cenazeyê Tatli bibin navçeya Farqîn a Amedê. Abdulkadîr Tatli yê ku ev zêdetirî 25 salan e dihat rehîngirtin û hin nexweşiyên wî hebûn, di odeya sêkesî de bi tenê dima.
Parlamentera Şirnexê ya Partiya Wekhevî û Demokrasiyê ya Gelan (DEM Partî) Nevroz Ûysal Aslan li ser hesabê xwe yê medyaya dîjîtal X’ê ev yek parve kir: ‘’Kesekî din li girtîgehê jiyana xwe ji dest da! # Hate ragihandin ku Abdulkadîr Tatli yê ku li Gîrtîgeha Tîpa F Kirikkaleyê dihat rehîngirtin, jiyana xwe ji dest daye. Girtiyê ku ev zêdetirî 25 salan e dihate rehîngirtin û hin nexweşiyên wî hebûn, di odeya sêkesî de bi tenê dihat girtin. Li gorî daneyên Wezareta Edaletê bes di sala 2024’an de 818 girtiyan jiyana xwe ji dest dane û ji van 68 weke ‘‘xwekujiyê’’ hatine tomarkirin. Ev tablo ne cuda ye; krîzeke pergalê ye ku ji mirinên bi guman heya rûbirûhiştina girtiyên nexweş ya bi mirinê re ye. Girtîgeh veguherîne cihên zext, tecrîd û normalîzebûna mirinên ji ber xemsariyê. Divê êdî ev yek werin sekinandin; divê dewlet berpirsiyariya xwe ya parastina jiyana welatiyan bi cih bîne. Divê ev rejîma înfazê ya dikuje were rakirin.’’
