Hevserokê Komeleya Çand, Yekîtî, Piştevanî û Alîkariya bi Malbatên Xizmên xwe Winda kirine ya li Dergûşa Şaristaniyan (MEBYA-DER) Mehmet Emîn Kiliç li ser biryara fesixkirinê ya PKK’ê û gavên divê dewleta Tirk biavêje ji ANF’ê re axivî.
Kiliç got, “Heta niha Kurd û Tevgear Azadiyê ya Kurd ew alî ye ku şer tercîh nekiriye” û destnîşan kir ku divê her kes zanibe ev yek ji ber neçariyê hatibû kirin.
‘GELÊ KURD BI RENGEKÎ CIDÎ XWEDÎ LI PÊVAJOYÊ DERDIKEVE’
Kiliç diyar kir ku gelê Kurd li gel neheqî û êrîşên lê hatine kirin jî di aştiyê de israr dike, bi rengekî cidî xwedî li pêvajoya aştiyê derdikeve û bi dewamî got, “Divê ev firsend bê bikaranîn. Dawiya şer nîne. Divê bê zanîn ku şer çareserî nîne, diyalog çareserî ye. Tirkiye ji ber ku bersivê nade banga aştiyê dikeve bin berpirsyariyeke mezin. Hin derdor hene ku naxwazin ev pêvajo bi pêş ve biçe. Ji bo pêvajo têk neçe divê dewlet gavên cidî biavêje. Eger gavên bi wêrekî neyên avêtin, dibe ku em vê firsenda dîrokî ji dest bidin.”
‘DIVÊ DEWLET TAVILÊ GAVEKE ŞÊNBER BIAVÊJE’
Kiliç ragihand ku ji bo pêvajoya aştiyê bi rengekî erênî bi rê ve biçe divê dewlet tavilê gavên şênber biavêje û got, “Rêberê Gelê Kurd Abdullah Ocalan di sala 1993’an de jî got ew alîgirê aştiyê ye. Îro jî li heman cihî ye û aştiyê dixwaze. Eger dewletê wê demê bersiv dabûya banga Birêz Ocalan, me îro ewqas mirov ji dest nedida.
Ji bo ev pêvajo têk neçe, divê aliyê desthilatdariyê tavilê gavê biaveje. Gelê Kurd bersiv da banga Birêz Ocalan û bi rengekî cidî xwedî li pêvajoyê derket, gaveke wêrek avêt. PKK li gel ku di bin êrîşan de ye biryareke ji dil û wêrek da. Dewlet hîn li benda çi ye?”
