Di daxuyaniya Koordînasyona KJK’ê de hate gotin, “Di 23’ê Kanûna 2022’an de li paytexta Fransa Parîsê, kujerê dewleta Tirk a faşîst William li Navenda Çanda Kurd û kargehên Kurdan êrîş pêk anî û di encama êrîşê de Evîn Goyî (Emîne Kara) ku jiyana xwe bi temamî dabû şoreşê û di vê oxirê de 34 salan li her devera Kurdistanê têkoşiya, hunermendê Kurd Mîr Perwer (M. Şîrîn Aydin) û welatparêzê Kurd Abdurrahman Kizil şehîd bûn. Di salvegera duyemîn a şehadeta wan de em van şehîdên xwe yên hêja bi hurmet, hezkirin û minet bi bîr tînin û soza xwe dubare dikin ku armanca wan a ji bo jiyaneke bi rûmet û azad pêk bînin.”
EVÎN GOYÎ QÎRÎNA JIYANA AZAD A JINÊN KURD GIHAND CÎHANÊ
Di daxuyaniya KJK’ê de hate gotin, “Hevrêya me Evîn li nava kevneşopiya berxwedanê ya Botanê mezin bû, welatparêzî bi rengê herî kûr hîs kir û weke nîşaneya vê welatparêziyê jî bû mînaka herî bedew a dilsoziya jinê ya bi xakê re. Ji bo kevneşopiya berxwedanê ya Botanê bigihîne her devera Kurdistanê, bi taybetî jî bigihîne jinên Kurd û hemû jinan, bênavber têkoşiya. Di nava van 34 salên têr û tijî de li ku derê pêwîstî pê hebûya li wê derê têkoşiya, ji bo karibe felsefeya jiyana azad a Rêber Apo bigihîne hemû jinan, hewl da. Tovên jiyana azad ên ku ji Rêber Apo wergirt li dilê hemû jinan reşand, ji bo jin di jiyana azad de israr bike û ev jiyan şîn bibe, xebitî. Bi tespîta ‘Jin a azad, Kurdistan a azad e’ ya Rêber Apo bi rê ket, ji xwe destpê kir û ji bo jinên Kurd hemû azad bibin, têkoşiya. Ji partîbûna jinên Kurd heta bi xweparastin û avakirina sîstema xwe ya demokratîk di her karî de bi rengekî çalak cih girt, qîrîna jiyana azad a jinên Kurd gihand cîhanê.
Welatparêzê me yê hêja Mîr Perwer jî li hemberî êrîşên qirkirina çandî yên dijmin li Ewropayê tevlî karê çandê bû, ziman û hunera Kurd parast û li dijî qirkirinê têkoşiya. Êşên ku dewleta Tirk a faşîst bi Kurdistanê dide kişandin û berxwedana li dijî van kiryarên faşîst di stranên xwe de vegot.
Welatparêzê me yê kedkar Abdurrahman Kizil jî li Ewropayê timî di nava têkoşînê de bû, nirx û çanda xwe parast û bû mînaka ji welatparêziyê. Jiyana li sirgûniyê qebûl nekir û teslîmî jiyana li Ewropayê nebû, bi nirxên Kurdistanî re dilsoz ma, di dilê xwe de timî cih da xeyala vegera rojekê ya li Kurdistanê.
Dewleta Tirk a faşîst qirker di şexsê van mirovên me yên hêja de êrîş bir ser çand û welatparêziya Kurd.
9 sal piştî ku di sala 2013’yan de li Parîsê sê jinên şoreşger hedef hatin girtin, ev bûyera ku weke komkujiya duyemîn a Parîsê derbasî dîrokê bû, yek ji kiryarên faşîzan ên dewleta Tirk a qirker a li Ewropayê li ser esasê êrîşên qirkirin û plana hilweşînê pêk anî bû.
Dewleta Tirk a faşîst ji bo temamkirina qirkirina Kurdan serî li her şêwe rêbazên qirêj dide û komkujiyên xwe yên li Kurdistan, Ewropa û Rojhilata Navîn dewam dike, bi taybetî jî jinên şoreşger hedef digire. Êrîşên dawî yên li hemberî Rojava ku hevrêya me Evîn Goyî li wir li dijî çeteyên DAÎŞ’ê yên dixwazin jinan bikişîne nava tarîtiyê têkoşiya, dewama vê plana hilweşînê ye. Herî dawî di encama êrîşa qirêj a 18’ê Kanûnê de xebatkarên çapemeniya azad Cîhan Bîlgîn û Nazim Daştan şehîd bûn. Di şexsê van her du xebatkarên çapemeniyê de em hemû şehîdên çapemeniyê bi rêzdarî û minetdarî bi bîr tînin û em diyar dikin ku em di wê baweriyê de ne ku generalên Apê Mûsa û şopdarên Gûrbetellî Ersoz wê ti carî neqedin.
Dewleta Tirk ji bo temamkirina qirkirina Kurd, ji perwerde, lojîstîk û cepxaneyê bigire di her warî de piştgiriyê dide çeteyên ku ji bo hemû mirovahiyê xeterî ne, ji bo bihêzbûna wan dixebite. Bi taybetî jî li dijî şoreşa Rojava, şoreşa jinê ya Rojava ku hêviya gelan e, zêdeyî 10 sal in çeteyan tîmar dike, zindî dike û bi vî rengî êrîş dike. Dixwaze gel û jinên ku ev şoreş pêk anîne, tune bike. Li kuderê Kurdekê dixwaze azad û birûmet bijî hebe, hedef digire û bi vê armancê jî dixwaze çeteyên xwe bigihîne her devera cîhanê. Di vî warî de neçareserkirina pirsgirêka Kurd tenê ne ji bo Kurd û Kurdistanê, ji bo Rojhilata Navîn, Ewropa û cîhanê bûye xeterî.
HÊZA RASTEQÎN A LI PIŞT KUJER, DEWLETA TIRK E
Bêdengiya li hemberî van komkujiyên dewleta Tirk a faşîst ên ku li Ewropa û Kurdistanê pêk tîne, çeteyên Tirk xurt dike û dibe sedem ku ev çete bibin bela serê hemû mirovahiyê. Tevî ku kujer diyar in, îtîrafên sîxurên MÎT’ê jî di nav de gelek îspat hene ku ev komkujî ji aliyê dewleta Tirk a faşîst ve hatine kirin, hikûmeta Fransayê sîstema xwe ya hiqûq û edaletê tune dihesibîne û dewleta Tirk nadarizîne. Ev yek hêz dide çeteyan û pêşî li van êrîşên ku ji bo her kesê û hemû Ewropayê xeter in, vedike. Hêz û faîlê li pişt kujeran, dewleta Tirk a faşîst û MÎT e. Dewleta Tirk û MÎT, li Kurdistanê û her derê weke sûcdarê şer sûc dike. Li Parîsê û her derê vî sûcê şer dike. Îro li Bakur û Rojhilatê Sûriyeyê, heman sûcê şer bi qetilkirina mirovên sivîl, zarokan, jinan pêk tîne û mîna DAÎŞ’ê serê jinan jê dike, tecawiz dike, rojnamevanên azad qetil dike û bi vî rengî sûcê xwe yê şer didomîne. Dewleta Tirk û Erdogan ên ku van sûcan dikin, divê demildest di dadgehên navneteweyî de bên darizandin û cezakirin.
EM BEŞDARÎ ÇALAKIYAN HEMÛYAN BIBIN
Hemû ciwan û jin divê bizanin ku wateya herî rast a dilsoziya bi Evîn Goyî û hemû şehîdan re, parastin û xurtkirina şoreşa azadiyê û şoreşa jinê ye û têkoşînê mezin bikin. Li ser vî bingehî bi wesîleya sala duyemîn a komkujiya Parîsê ya 2’yemîn, bi taybetî jin û ciwan em bang li hemû gelê xwe dikin ku têkoşînê mezin bikin ku heta ku kujerên rast tên darizandin û beşdarî hemû çalakiyên ku wê ji 23’yê Kanûnê heta 11’ê Çileyê bên kirin, bibin.
Êrîşên li ser Bakur û Rojhilatê Sûriyeyê, her roj zêde dibin. Em bang li hemû gelê xwe û dostên xwe dikin ku xwedî li şoreşê derbikevin, nirxên şoreşê li her dera Kurdistan û cîhanê mezin bikin.”
