Konseya Rêveber a KNK’ê bi helkefta 38’emîn salvegera Komkujiya Helebçeyê daxuyaniyeke nivîskî weşand û şehîd bi bîr anîn.
Di daxuyaniyê de hat bibîrxistin ku hêzên rejîma dagirker a Iraqê di 16’ê Adara 1988’an de bi çekên kîmyewî yên qedexekirî li Helebçeyê li dijî gelê sivîl komkujiyeke mezin pêk aniye û hat gotin: “Di encama komkujiyê de nêzî 5 hezar jin, zarok, mêr û kal û pîrên sivîl û bêguneh hatin şehîdkirin. Bombebarkirina Helebçeyê, yek ji zincîra sûcên polîtîkaya qirkirinê ya rejîma Baas a dagirker a Saddam Huseyîn bû ku li Başûrê Kurdistanê dimeşand. Ev polîtîkaya qirkirinê bi êrîşên kîmyewî yên li ser herêmên Behdînan, Balîsan, Qeredax û Şêxwasan dest pê kir û bi operasyonên Enfalê berdewam kir. Armanca vê jî tune kirina gelê Kurd û Kurdistanê bû.”
HELEBÇE YEK JI WEHŞETÊN HERÎ MEZIN ÊN SEDSALA 20’AN E
Di daxuyaniyê de hat destnîşankirin ku rejîma Baas ji roja ku li Iraqê hat ser desthilatdariyê û vir ve dest bi komkujî û asîmîlasyona Kurdan kiriye: “Di serî de mîna gurên birçî ketin pey gelê Kurd û bi deh hezaran Kurdên Feylî qetil kirin, bi deh hezaran jî bi darê zorê koçber kirin; hîna jî çarenûsa piraniya wan nayê zanîn. Di destpêka salên 80’yî de 8 hezar Kurdên herêma Barzan di Enfalê de zindî bi zindî qetil kirin. Di pêvajoya ku wek operasyonên Enfalê tê naskirin û nêzî 4 salan ajot de, ji Germiyanê heta Behdînanê zêdetirî 182 hezar sivîlên bêguneh birin çolên başûrê Iraqê û bi wehşet qetil kirin. Li Kurdistanê zêdetirî 4 hezar gund hatin rûxandin. Lê belê ya ku li Helebçeyê qewimî, yek ji wehşetên herî mezin ên sedsala 20’an e. Di nava çend saetan de nêzî 5 hezar kes hatin qetilkirin û bi hezaran kes birîndar bûn. Bi vî rengî Helebçe ji bo gelê Kurd bû êş û birineke mezin.”
LI DIJÎ KOMKUJİYÊN NÛ DIVÊ HÊZÊN SİYASÎ DI NAVA TIFAQÊ DE BIN
Di daxuyaniyê de hat diyarkirin ku di sedsala borî de li dijî gelê me gelek komkujî hatine kirin, lê ev komkujî wekî qirkirin nehatine naskirin û di dadgehên navneteweyî de nehatine darizandin.
KNK’ê hişyarî da ku metirsiya komkujî û qirkirinê ya li ser Kurdan bi dawî nebûye û li her çar parçeyên Kurdistanê berdewam dike: “Duh li Şengalê li dijî gelê me yê Êzidî komkujiyek pêk hat, bi hezaran mirov bi komî hatin qetilkirin û revandin. Ew gef hîna jî li ser Şengalê heye. Berî deh salan li Cizîra Botan û berî heşt salan li Efrînê komkujiyeke mezin qewimî. Berî heft salan heman senaryo li Serêkaniyê û Girê Spî hat dubarekirin. Berî du mehan li Helebê û li seranserê Rojava hewl dan heman senaryoyê pêk bînin. Niha jî li herêma Rojhilata Navîn şer û pevçûnên mezin hene û metirsiya komkujiyê berdewam dike.
Divê em zanibin ku di 38’emîn salvegera Komkujiya Helebçeyê de heman gef hîna di rojevê de ye. Ji bo ku Helebçeyên nû neyên jiyîn, divê hêzên siyasî di nava tifaqê de bin, Hêzên Parastina Kurdistanê bibin yek, bi hêz bibin û Kurdistanê bi hev re biparêzin.”
EM Ê KOMKUJİYÊN LI DIJÎ GELÊ ME HATINE KIRIN JI BÎR NEKIN
Di berdewamiya daxuyaniyê de ev xal hatin rêzkirin: “Îro avakirina herêmên Enfalê û hemû deverên ku komkujî lê qewimîne, başkirina şert û mercên jiyanê û dermankirina birînan, erka me ya neteweyî, wijdanî û sincî ye. Yek ji erkên me yên neteweyî, wijdanî û sincî jî avakirina Helebçeyê û başkirina jiyana xelkê Helebçeyê ye. Divê her cure xizmetguzarî ji bo xelkê Helebçeyê bê dabînkirin. Helebçe divê di her warî de ji nû ve bê avakirin. Bîranîna Helebçe û qirkirina Helebçeyê divê tenê di çarçoveya merasîman de nemîne, bi çalakî û hewildanên civakî, çandî û hunerî her dem bê bibîranîn.
Felaketa trajîk a li Helebçeyê, bûye sembola nasnameya zilmê ya li ser Kurdan. Komkujiya li Şengalê jî di heman rêyê de bû sedema avabûna vê nasnameyê. Li gel van nasnameyan, berxwedana li Kobanê, eniya yekbûyî ya hêzên Kurd a li dijî terora DAÎŞ’ê û parastina hevpar, nasnameyeke xwerû afirand. Ev wêrêkî û berxwedana hêzên parastinê ya li dijî dagirker û terorîzmê, ligel ku di cîhanê de deng veda, hêzeke mezin dide me û ji bo armancên me yên pîroz deriyên berfirehtir vedike.
Em ê Helebçeyê tu carî ji bîr nekin. Wekî ku em ê Dersim, Geliyê Zîlan, Serdeşt, Merîwan, Amûdê, Enfal, Kurdên Feylî, Yarsan û Êzidî, Şengal, Roboskî û tu komkujiyên ku bi destê dagirkeran li dijî gelê me hatine kirin ji bîr nekin; em ê Cizîra Botan, Şengal, Heleb û Helebçeyê jî ji bîr nekin.
Em careke din di şexsê şehîdên Helebçe û Enfalê de hemû şehîdên Kurdistanê bi bîr tînin û li ber bîranîna wan bejna xwe ditewînin. Em rejîmên komkujer û dagirkerên Kurdistanê jî bi tundî şermezar dikin.”
