Konseya Rêveber a Kongreya Neteweyî ya Kurdistanê (KNK) têkildarî şerê navbera Îran û Îsraîlê daxuyaniyek da.
ŞERÊ ÎRAN Û ÎSRAÎLÊ BÛYE MESELEYEKE NAVNETEWEYÎ
Di destpêka daxuyaniyê de hate ragihandin ku şerê Îran û Îsraîlê şerekî nû nîne û hate gotin, “Ev e serê dehan salane di navbera Îran û Îsraîl da nakokî û şer hene. Heta niha ev şer di navbera Îsraîl û hêzên wekîl ên hevalbendên Îranê de çêdibû, lê ev e 10 roj in şer raste rast di navbera Îsraîl û Îranê de pêk tê. Ji doh ve Dewletên Yekbûyî yên Emerîka (DYE) jî tevlî şer bûye. Ev şer hingî diçe mezintir û firehtir dibe. Vî şerî li Xezeyê destpê kir, derbasê Libnan, Suriye û Yemenê bû. Niha jî derbasî Îranê bûye. Mesele ji meseleya di navbera du dewletan de derbas kiriye, bûye meseleyek navneteweyî û cîhanî.”
GELÊ KURD ALIYEKÎ VÎ ŞERÎ NÎNE, LÊ DIXWAZE PIRSGIRÊK HEMÛ BI DIYALOG Û AŞTIYANE BÊNE ÇARESERKIRIN
KNK’ê destnîşan kir ku gelê Kurd di vî şerî de alî nîne û got, “Her çiqas em teref nebin jî, lê ev şer me ji nêzîk ve eleqedar dike û bandoreke mezin li ser gel û welatê me dike. Li Rojhilatê Kurdistanê gelek binke û baregehên leşkerî yên Îranê têne hedef girtin û di van êrîşan de gelê me yê li wê herêmê zerer dibîne. Li alê din piraniya moşek û firokên van welatan li ser Kurdistanê re derbas dibin. Em weke gelê Kurd ne terefê şer in û em dixwazin hemî pirs û pirsgirêkên herêma me, bi rêya diyolog û aştiyê bêne çareserkirin. Ev şer ne me derxistîye, lê em di nava vî şerî da dimînin.”
STATUKOYA SYKES-PICOT Û LOZANÊ TÊK DIÇE, NEXŞEYA HERÊMÊ TÊ GUHERTIN, YEKRÊZIYA NAVA KURDAN GELEKÎ GIRÎNG E
Daxuyaniya KNK’ê bi vî rengî dewam kir:
“Ev şerê ku ev e 21 meh in li herêma Rojhilat Navîn destpê kiriye û dewam dike, wê encamên mezin bi xwe re bîne. Statukoya Sykes-Picot û Lozanê, li herêmê têk diçe. Di encama vî şerî da dikare nexşeya herêmê bi temamî bê guhertin. Gelo em weke gelê Kurd ji van guhertinan re çiqas amade ne? Ev pirseke girîng û mezin e. Di vê demê da yekrêziya nav mala Kurd gelek girîng e û heyatî ye. Di serî de hêzên Rojhilatê Kurdistanê, peyre jî hemî hêzên Kurdistanî, divê vê demê tevbigerin û yekîtîya xwe xurttir bikin.
HEWLDANÊN JI BO AVAKIRIN PLATFORMEKE HEVBEŞ A PARTÎ Û RÊXISTINÊN ROJHILATÊ KURDISTANÊ
Em weke KNK, ji bo yekrêziya nav mala Kurd weke herdemî di nava liv û tevgerê de ne. Em ê vê liv û tevgera xwe xurttir bikin. Bi taybetî ku niha Rojhilata Kurdistanê di rojevê de ye, em ê jî bala xwe zêdetir bidin li ser vî parçeyê welatê xwe. Ji xwe eve demeke em di nava partî û rêxistinên Rojhilatê Kurdistanê de, ji bo avakirina platformekî hevbeş kar dikin. Ev karê me berdewam e. Di vî warî da em ê van rojan zêdetir diyalogê bi pêş bixin, bi hemî cureyên peywendiyan, bi serdana partî û rêxistinan em ê hewl bidin ku mekanîzmayek hemahengiyê di nava partî û rêxistinên Rojhilatê Kurdistanê de pêk bînin.”
Daxuyaniya KNK’ê bi vî rengî bi dawî bû:
“Bi vê munasbetê, di serî de hêzên Rojhilatê Kurdistanê, em bang li hemî hêz, partî, rêxistin û saziyên Kurdistanî dikin ku alîkariya xebatên me yên yekrêzya nav mala Kurd bikin û zûtirin demê de werin gel hev û li ser stratejîyek hevbeş bi tevbigerin.
Her wiha em bang li Îran, Îsraîl û Emerîka dikin ku rojekî zûtir şer rawestênin û bizîvirin ser maseya diyalogê û pirs û pşrsgirêkên xwe bi rêya aştiyê çareser bikin.”
