Konseya Rêveber a KNK’ê bi daxuyaniyekê cejna Çarşema Serê Nîsanê li civaka Êzidî, gelê Kurd, gelên Kurdistanê û herêmê pîroz kir.
KNK’ê di daxuyaniya xwe de daxwaz kir ku cejn li gel wate, dîrok, ol û nirxên xwe yên dîrokî di nava hemû civak û gelan de bibe wesîleya aşitiya mayînde û got: “Em a niha Çarşema Serê Nîsanê pîroz dikin. Geg û talûkeyên li ser civaka me ya Êzidî yên li Şengal, Efrîn û Serêkaniyê berdewam dikin. Rewşa li Şengalê hê tam diyar nebûye û gefa komkujiyeke nû hê di rojevê de ye. Her çend gelê me dest bi vegera ji bo Efrîn û Serêkaniyê kiribe jî li van her du herêman yên ji Êzîdîtiyê bawer dikin, di bin gef û talûkeyê de ne.”
KNK’ê di dewama daxuyaniya xwe de ev yek anîn ziman: “Şengal li gel pêkhateyên xwe herêmeke xwedî teybetmendiyên cuda ye. Piraniya şêniyên wê Kurdên Êzidî ne û Şengal parçeyeke ji axa Kurdistanê ye. Ji ber vê teybetmendîyê jî, serê sedan salane bûye hedef. Herî dawî jî, wehşeta ji alê DAIŞ’ê ve li Şengalê hatî kirin, birînên kûr li laşê Şingalîyan de vekirine.
Niha jî hikumeta Bexdayê jî di nav de ji teref hinek hêzan ve, li Şengalê dem dem provokasyon têne çêkirin. Amanca van provokasyonan ew e ku Rêveberîya Xweser ya Şengalê hilweşînin û gelê Şingalê bê rêveberî û bê parastin bihêlin. Divê îradeya xelkê Şengalê, esas bê girtin. Ji bo parastina civaka Êzidî, pêwîst e hemû hêz û gelê me hişyar bin û xwedî li gelê me yê Êzidî derkevin. Divê Şengal, rewşa xelkê Şengalê û pirsgirêkên Şengalê, bi awayekî teybet bêne destgirtin û çareserî jêre bêne dîtin.
Daxuyaniya KNK’ê bi vî rengî bi dawî bû: “Gelê Kurd, tevahî gelên li Kurdistanê, xwedî kîjan baweriyê bin bila bibin, divê bi berpirsiyarî tevbigerin. Divê li dijî dijminên hov û dagirker, di nava yekîtiyek dilsoz de tev bigerin. Li gel hev û ji bo jiyaneke bi rûmet ya paşerojan, li gorî nirx, wate û pîroziyên qedîm tevbigerin. Her wiha bawermendên Êzidî, Yarsan, Elewî, Ehlî Heq û Mesîhî, divê bi nîzingbûnek û bi hişmendîyek teybet bêne parastin.
Bi azadî û bextewarî pîroz kirina cejnên me jî, bi serketina me ve girêdayî ye. Wateya Cejna Çarşema Sor jî, vê berpirsiyarî û baweriyê ji me dixwaze. Bi vê hêvî û daxwazê, em weke KNK, carekî dî cejna Çarşema Sor li civaka Êzidî, gelê kurd û tevahiya gelên li herêmê pîroz dikin.”
