Komîteya Amadekariya Mîtîng û Meşa li dijî Peymana Lozanê ku Kongreya Neteweyî ya Kurdistanê (KNK) jî di nav de ye, bi wesîleya salvegera 102’emîn a vê peymanê ku Kurdistan kir çar parçe, bi beşdariya hemû partî û rêxistinên Kurdan 26’ê Tîrmehê meş û mîtîngekê lidar dixe.
Konseya Rêveber a KNK’ê daxuyaniyek weşand û bang li partî, sazî, organîzasyon û kesayetên Kurdistanî hemûyan kir ku ji bo peyamên xwe yên li ser mijarê bigihînin raya giştî beşdarî meş û mîtînga li Lozanê bibin. KNK’ê he wiha ragihand ku wê li Lozanê deklarasyonek bê pêşkêşkirin.
Di daxuyaniyê de hate ragihandin ku rojeva esasî ya civîna 5’ê Tîrmehê ya Konseya Rêveber a KNK’ê Peymana Lozanê bû û bal kişand ser vê tespîta di encamnameyê de hate kirin: “Em salvegera 102’emîn a Peymana Lozanê pêşwazî dikin. KNK dixwaze di salvegera 102’emîn a Peymana Lozanê de nîqaşeke nû bixe rojeva Kurdistaniyan hemûyan. Statukoya Sykes-Picot û Lozanê hildiweşe. Nexşerê diguhere. Em Kurd û Kurdistanî di dema herî kurt de li hev kom bibin û li gorî vê yekê helwestê nîşan bidin. Lewma em bang li partî, sazî û hêzên Kurdistanî hemûyan, bang li tevahiya gelê Kurdistanê dikin ku di konferanseke neteweyî de bicivin û stratejiyeke hevpar ava bikin.”
Di daxuyaniya KNK’ê de hate destnîşankirin ku di salvegera 102’emîn a Peymana Lozanê de ev bang wê li Lozanê careke din bê kirin.
Plansaziya meş û mîtîngê bi vî rengî ye:
Cih û dema çalakiyê: Lozan, 26’ê Tîrmeha 2025
Dem û cihê kombûn û destpêkirina meşê: Saet 13:00-14:00, Terrase Jean Monnet
Dem û cihê mîtîngê: Saet 16:00, Port Ouchy
