Konseya Rêveber a Kongreya Neteweyî ya Kurdistanê (KNK), derbarê tayînkirina qeyûman a li Şaredariya Bajarê Mezin a Mêrdînê û şaredariyên Êlih û Xelfetî ya Rihayê daxuyaniyek nivîskî weşand.
‘ÎRADEYA GEL TÊ XESPKIRIN’
Konseya Rêveber a KNK’ê, destnîşan kir ku êrîşên desthilatdariya AKP-MHP’ê ya li dijî rêveberiyên herêmî yên Kurd û Kurdistanê berdewam dike û ev tişt hate gotin, “Piştî ku hefteya borî tayînkirina qeyûm li ser şaredariya navçeya Esenyurtê ya bajarê Stenbolê ya CHP’ê, ku ji ber serokê şaredariya Esenyurtê Kurd bû, Îro jî hevşaredarên bajarên Bakurê Kurdistanê Mêrdîn, Êlih û Xelfetî, ji wezîfeyê hatin avêtin û li şûna wan qeyûm hatin tayînkirin. Rejîma Tirk di nava deh salan de ev cara sêyemîn e ku îradeya gelê Kurd a demokratîk xesp dike û bi awayekî bê hiqûqî dest datîne ser rêveberiyên herêmî yên Kurdistanê.
Îro li Mêrdînê polîsan di saetên sibehê de avahiya şaredariyê dorpêç kirin. Di heman demê de hevşaredarê parêzgehê Ahmet Turk ku bi rêjeya ji sedî 57,4 dengan hatibû hilbijartin, bi fermana Wezîrê Karê Hundir ji wezîfeyê hate dûrkirin û ketina meqamê wî hat astengkirin. Di hemen demê de li Êlihê jî qeyûm hat tayînkirin û hevşaredar Gulîstan Sonuk a ku ji sedî 64,52’ê dengan hatibû hilbijartin, ji wezîfeyê hat girtin. Her wiha li navçeya Xelfetî ya Rihayê jî avahiya şaredarî ji aliyê polîsan ve hat dorpêçkirin. Hevşaredar Mehmet Karayilan ku bi piranîya dengan hatibû hilbijartin ji wezîfeyê hat girtin.
Hevşaredar Ahmet Turk, Gulîstan Sonuk, Ahmet Ozer û Mehmet Karayilan ji aliyê civakên xwe ve bi xebatên hilbijartinê yên rewa hatine hilbijartin û dûrxistina wan ji bo welatiyên ku baweriya xwe bi wan anîne, bê hûrmetiyek mezine. Ev kiryar ne tenê guh nade deng û îradeya xelkê, di heman demê de berdewakirina rejîma faşîst û talankere.
Tayînkirina qeyûmên li Mêrdîn, Êlih, Esenyurt û Xelfetiyê, xespkirina îradeya gelê Kurde, êrîşeke dijî hemû pîvanên hiqûqî û demokrasîyê ye. Astengkirina avahiyên şaredariyan, girtin û binçavkirina kesên hilbijartî, kiryarên zalmane ne ku pîvanên navneteweyî û prensîbên demokrasî, aştî û azadiyê binpê dike. Em weke KNK’ê van êrîş û kiryaran bi tundî şermezar û mehkûm dikin.
Dewleta Tirk her ku diçe xwe ji pîvanên navneteweyî dûr dixe. Mixabin hêzên cihanî û saziyên navneteweyî ji ber berjewendiyên xwe yên jeopolîtîk û aborî bêdeng in. Bêdengiya NY (Neteweyên Yekbûyî), YE (Yekîtîya Ewropa), KE (Konseya Ewropayê) û sazîyên weke wan, cesaretê dide rejîma faşîst a AKP-MHPê. Em bang li hêzên cîhana demokratîk û hemî saziyên navneteweyî dikin ku li hember van kiryaran bê deng nemînin û li dijî vê bê hiqûqî û bê edaletiyê derkevin.
BANGA PIŞTGIRIYÊ HAT KIRIN
Em bang li hemû şaredarî û şaredarên pêşverû yên cîhanê dikin ku li dijî vê ferzkirina bê hiqûqî rawestin û bi şaredar û şaredariyên Kurdistanê re bibin hevkar.
‘EM Ê DI MAFÊ XWE YÊ ÇARENÛSÎ, DEMOKRASÎ Û ÎRADEYA AZAD DE ISRAR BIKIN’
Em bang dikin ku demildest ev kiyar bêne rawestandin, qeyûm bêne rakirin û kesên hilbijartî vegerin ser wezîfeyên xwe yên rewa. Divê vîna gel û mafên demokratîk ên destûrî bi ser bikeve.
Mafê xwerêveberiyê esase û em ê hilweşandina nirxên demokratîk qebûl nekin. Li hember vê bê edaletîyê gelê Kurd gav paşve navêje; em ê di mafê xwe yê çarenûsî, demokrasî û îradeya azad de israr bikin.
Em bang li gelê Kurd û mûxalefeta demokratîk a Tirkiyê dikin ku vê bê adaletiyê qebûl nekin û rabin ser piya û li hember vê bê hiqûqiyê rawestin û van şaredariya paşve bistînin.”
