Daxuyaniya Koma Berxwedan bi vî rengî ye:
“Saziyên me rûmeta me ne. Di vê nîv sedsalê de gelê Kurd bi xwîn, hêsir û xwêdana xwe li welat û derveyî welat bi sedan komele û sazî vekirin. Ji bo parastina xwe, ziman û çanda xwe şev û rojên xwe kirin yek û li hemberî êrîşan heya sibehê nobedariya wan kirin.
Hatin girtin, hatin kuştin, mafê wan ji dest wan girtin, lê çog dananîn. Peyv têra pênasîna vê fedekariyê nakin. Ji van saziyan jî saziyên hunerî û çandî ne. Ji 1983’yan bi avakirina Hunerkom re û heya îro li hemberî talan, tunekirin û asîmîlasyonê hunermendên welatperwer şev û rojên xwe dan vê erkê pîroz.
Tî man, birçî û bêcih man, li rêyan man, hatin girtin, koçber bûn lê rojekê jî dest ji têkoşînê bernedane. Li gorî derfetên ku ew tê de, li gorî cihên ew lê dimînin, têkoşîna xwe dewam dikin.
Populîzim, madiyet û ez-ezîtiyê nikarîbû berê wan biguhere. Ew her tim parastvanên civak û saziyên xwe mane.
Di bin navê rexne û gazinan de êrîşên ji derveyî exlaq tên ser saziyên me. Heya deverekê û ji bo rêzgirtina ji fikrên cuda re mirov bê deng dimîne, lê eger yekser ev sazî û nirxên civakê, rêveberî û têkoşîna ku qelenê wê bi hezaran şehîd in, bibin armanca egoist-narsîstan, bên biçûkxistin û heta êrîşên ku hin saziyên kontra nekirine bikin, wê demê mesele ji rexne û gazinan wêdetir e.
Mesele îstismarkirina helwestên nefsên lawaz e û wergerandina wê weke kampanyayekê ku ji yek navendê bi rêve diçe û yekser reşkirina têkoşîna azadiyê ye.
Em wan êrîşan ji şerê ku dagirker li hemberî têkoşîna Azadiya Kurdistanê dimeşînin cuda nabînin, armanca her du hêlan têkbirina destketiyên gelê Kurd e, reşkirina tevgera bi hezaran şehîdan e.
Li vir em ji gelê xwe re dibêjin;
Ew saziya ku bingeha wê Şehîd Sefkan, Şehîd Mizgîn û Şehîd Çiya danîn û bi sedan hunermend mezin kirin û xwedî li wan derket û heya roja îro anîn, emaneteke li cem me. Ne pêkan e ku em li hemberî van êrîşan bêdeng bimînin.
Ji bo me ew êrîş di serî de li hemberî têkoşîna azadiya Kurdistanê ye. Ew êrîş reşkirina şopa pîroz a wan şehîdan e.
Lewma em bi tundî van êrîş û êrîşkaran şermezar dikin.
Bersiva me ev e;
Ji her demê bêhtir em ê xwedî li saziyên xwe derkevin. Em ê rê nedin çanda dewletên serdest û populîst ku naveroka keda nîv sedsalê reş bikin.”
