Komîteya Kampanya “Azadî ji Abdullah Ocalan re, Çareseriya Siyasî ji Pirsgirêka Kurd re” di daxuyaniyê de salvegera duyemîn a kampanyayê pîroz kir.
Daxuyanî bi vî rengî ye:
“Dema ku kampanyayê 10’ê Cotmeha 2023’an destpê kir, Abdullah Ocalan di bin tecrîdeke giran de bû; nêzî çar salan bi ti awayî ji Girtîgeha Îmraliyê agahiyek an jî nîşaneyeke jiyanê nedihat wergirtin. Ocalan hîn jî girtî ye, lê belê di nava du salên dawî de li cîhanê guhertinên mezin pêk hatin: Destpêkirina pêvajoya ‘Aştî û Civaka Demokratîk’ ji aliyê Ocalan ve û gavên girîng ên civak û tevgerên Kurd avêtin, nîşaneyên şênber ên vê guherînê ne.
Niha ew dem e ku ji her demê bêhtir bi israr destnîşn bikin ku çareseriyeke siyasî ji bo pirsgirêka Kurd pêkan e, daxwaza aştiyê bîne ser ziman û daxwaza azadiya Abdullah Ocalan bê kirin.
Di nava du salên dawî de li 6 parzemînan bi sedan çalakî, nîqaş, protesto, konser û çalakiyên cuda hatin lidarxistin. Ev hewldanên ku li dora armancekê kom bûn, îradeya gelan û hêzên demokratîk ên li seranserê cîhanê li ber xwe didin, biryardariya wan û asta gerdûnî ya fikrên Ocalan raxist pêş çavan. Bi gotina Ocalan ‘Her cihê ku nivîsên min li wir bin ez jî li wir im’.
Di nava 2 salên derbasbûyî de me dît ku fikrên wî li çar aliyên cîhanê ji aliyê gelan û tevgeran ve bi rengekî afirîner û şoreşger bi cih hatin anîn. Ev yek pêvajoyeke çandina tovên enternasyonalîzmeke nû ye.
Di salvegera duyemîn a kampanya ‘Azadî ji Abdullah Ocalan re, Çareseriya Siyasî ji Pirsgirêka Kurd re’ em silavên xwe ji her kesî re dişînin ku di nava du salên dawî de piştgirî dan vê dozê. Di heman demê de em bang li gel û tevgerên demokratîk û şoreşger dikin ku li ser vê rêyê meşa xwe dewam bikin. Rêya me dirêj jî be çareserî di destê me de ye.
Îro ji her demê bêhtir tişta ku divê ji aliyê cîhanê ve bê dîtin ew e; alternatîfa rejîmên mêtinger û şer ên modernîteya kapîtalîst ne tenê pêkan e; di heman demê de ji aliyê gelên li azadiyê digerin ve bi rengekî çalak tê avakirin.
Li Tirkiyeyê aştî û demokrasî tenê bi çareserkirina pirsgirêka Kurd dibe. Azadiya Ocalan ku muxatabê sereke yê pêvajoya aştiyê ye û yekane nûnerê gelê Kurd ê li qada navneteweyî naskirî ye, ji bo serketina vê pêvajoyê nebe nabe.
Divê Yekîtiya Ewropa û aktorên navneteweyî di mijara piştgiriya bi pêvajoyê re helwesteke hîn xurt nîşan bidin, bi taybetî jî Yekîtiya Ewropa û Neteweyên Yekbûyî berpirsyariyên xwe bic ih bînin, ji bo PKK ji lîsteya terorê bê derxistin gavên şênber biavêjin.
Niha dema azadiya Abdullah Ocalan e!”
