Tora Navneteweyî ya ji bo Azadiya Abdullah Ocalan û Çareseriya Siyasî ya Pirsgirêka Kurd bi sernavê “Tevdîrên Lezgîn ên ku divê Komîteya Wezîran ji bo Azadiya Abdullah Ocalan bigire” daxuyaniyek belav kir.
Di daxuyaniyê de, bal hate kişandin ser wê yekê ku Komîteya Wezîran di civîna xwe ya sala 2024’an de ji bo ku Tirkiye guhertinên zagonî yên pêwîst pêk bîne salek dem dabû, lê dewleta Tirk di vê demê de li gorî vê yekê tevnegeriyaye û Komîteyê biryarek demkî standiye.
KOMÎTEYÊ RAYEYA KOMÎSYONA MECLÎSÊ YA JI BO PÊŞNIYARA GUHERTINÊN ZAGONÎ PEJIRAND
Tora Navneteweyî ya ji bo Azadiya Abdullah Ocalan û Çareseriya Siyasî ya Pirsgirêka Kurd di daxuyaniya xwe de, bi referansa biryara Komîteyê, bal kişand ser rola komîsyona meclîsê û wiha got:
“Komîteya Wezîran bang li rayedarên Tirk kir ku gavek berî gavekî tevdîrên pêwîst bigirin û daxwaz kir ku heta dawiya Pûşpera 2026’an agahiyên li ser tevdîrên ji bo bicîhanîna biryarên Dadgeha Mafên Mirov a Ewropayê (DMME) hatine girtin, bidin. Di tevdîrên demkî de, Komîteya Wezîran pejirand ku Komîsyona ‘Yekîtî, Biratî û Demokrasiyê ya Neteweyî’ ya nû, ku di çarçoveya pêvajoya ‘Aştî û Civaka Demokratîk’ a ku ji aliyê Rêberê Gelê Kurd Abdullah Ocalan ve hatî destpêkirin de hatiye avakirin, xwedî rayeya pêşniyara guhertinên zagonî li Meclîsê ye û mekanîzmayek e ku dikare ji bo naskirina ‘Mafê Hêviyê’ guhertinên zagonî yên pêwîst pêşniyar bike û bicîh bîne.
Di daxuyaniyê de hate gotin ku Komîteya Wezîran, wekî saziyek siyasî, nêzîkatiyek nîşan dide ku pêvajoya nû ya ji bo “Aştî û Civaka Demokratîk” a ku ji aliyê Rêber Apo ve hatiye destpêkirin û însiyatîfên wekî komîsyona nû ya Meclîsê nîşan dide.
Di daxuyaniyê de wiha hate gotin: “Komîte bi awayekî eşkere qebûl nake ku civaka Kurd, Abdullah Ocalan wekî nûnerê xwe yê sereke û nûnerê gelê kurd yê sereke ye, hêza ajokar e li pişt hemû gavên erênî yên di vê pêvajoyê de hatine avêtin e. Ji ber ku tevdîrên demkî bi pêvajoyên siyasî re têkildar in, rola krîtîk a Ocalan di avakirina aştiyê û demokrasiyê de û xebatên wî, û her wiha ew, muhatabê dewleta Tirk e di vê pêvajoyê de, divê bi heman awayî bêne berçav girtin. Ji ber vê jî; naskirina rola Ocalan ji bo her mekanîzmayeke domdar a ku lihevhatina zagonî bi diyaloga siyasî ve girêdide, neçariyek e.
BERTEK LI HEMBER GOTINA ‘TIRKIYEYA BÊTEROR E’
Tora Navneteweyî ya ji bo Azadiya Abdullah Ocalan û Çareseriya Siyasî ya Pirsgirêka Kurd biryara demkî ya Komîteyê rexne kir û ev bibîrxist: Heta niha ne hikûmeta Tirk ne jî komîsyonê, di warê rakirina cezayê ‘hepsa giran a heta hetayê’ an jî rêzgirtina zêdetir li mafên mirovan û hiqûqê de ti guhertinên zagonî nekirine.
Daxuyanî wiha berdewam kir: Di vê çarçoveyê de, Komîte li ser kîjan bingehan bawer dike ku Tirkiye dikare guhertinên pêwîst bike? Dînamîkên hundirîn ên hikûmeta Tirk ji bo pêkanîna veguherîna pêwîst têrê nakin û di vê çarçoveyê de divê Komîteya Wezîran û Konseya Ewropayê mekanîzmayên xwe yên bicîhanînê bikar bînin da ku Tirkiye biryarên DMME’ê bicîh bîne. Her wisa, bikaranîna gotina ‘Tirkiyeya Bêteror’ ji ber ku nêzîkatiyeke neteweperest a ku berovajî pêvajoya demokratîkbûnê ye, divê bê rexnekirin.
DESTÛRDAYÎNA BINPÊKIRINAN
Tora Navneteweyî ya ji bo Azadiya Abdullah Ocalan û Çareseriya Siyasî ya Pirsgirêka Kurd diyar kir ku ji bo dozên Rêber Apo û Koma Gurbanê, “Girîng e ku Komîte ji bo gavên xwe yên pêşerojê li benda Pûşpera 2026’an nemîne. Divê rola siyasî ya navendî ya Birêz Ocalan wekî nûnerê sereke û muhatabê gelê Kurd bê pejirandin. Dayîna demê ji Tirkiyeyê heta Pûşpera 2026’an tê wateya destûrdana berdewamkirina binpêkirinên Tirkiyeyê.
Tora Navneteweyî ya ji bo Azadiya Abdullah Ocalan û Çareseriya Siyasî ya Pirsgirêka Kurd daxwaz kir ku Komîte heyetekê ava bike da ku rewşê li cihê xwe lêkolîn bike û wiha got: Di pratîkê de, divê Komîte bifikire ku heyetekê bişîne Tirkiyeyê da ku rewşê rasterast lêkolîn bike, bi komîsyonên parlamentoyê re têkiliyê dayne û dilxwaziya hikûmetê ya ji bo derbaskirina peymanên daxuyaniyê rapor bike. Divê komîteyeke demkî were avakirin da ku bi taybetî pêşveçûnên di doza Birêz Ocalan de û bicîhanîna ‘Mafê Hêviyê’ bişopîne. Aştî û demokrasî li Tirkiyeyê tenê bi çareserkirina pirsgirêka Kurd dikare pêk were. Azadiya Birêz Ocalan, ku muhatabê sereke yê pêvajoya aştiyê û nûnerê naskirî yê navneteweyî yê gelê Kurd e, ji bo serkeftina vê pêvajoyê pêwîst e.
