Hevseroka Giştî ya DEM Partiyê Tulay Hatîmogûllari ji ber salvegear 46’emîn a Komkujiya Çorûmê daxuyaniyek li ser medya dîjîtal weşand.
Tulay Hatîmogûllari got, “Komkujiya Çorûmê ew hişê vî welatî ye ku di tarîtiyê de hatiye hiştin; birîneke mezin e ku êşa wê kêm nebûye, edalet pêk nehatiye û rûbirûbûn bi heqîqeta wê re nebûye. Ji Çorûmê heta bi Mereşê, ji Sêwasê heta bi Gaziyê ev hişê tarî hîn zindî ye.”
Hevseroka DEM partiyê qurbaniyên komkujiyê bi rêzdarî bi bîr anî û got, “Li ser bingeha welatîbûna wekhev em ê bi bawerî, nasname, cihêrengiya xwe bi hev re, bi rengekî azad bijîn.”
Tûncer Bakirhan jî bi bîr xist ku bi dehan welatiyên Elewî hatin qetilkirin û got, “Bi sedan mirov birîndar bûn, birîneke kûr di hişê civakî de vekir. Komkujiya Çorûmê encameke bi êş a nebaşiya rêxistinbûyî û zimanê nefretê û polîtîkayên tarîtiyê ye ku dixwest gelan, bawerî û nasnameyan bike dijminê hev.”
Tûncer Bakirhan anî ziman ku ji bo Tirkiye weke dewleteke hiqûqê ya demokratîk xurt bibe, pêwîstî bi wê yekê heye ku gel, bawerî û nasname bigihêjin aştiyeke civakî ya mayinde û got, “Rêya vê yekê jî rûbirûbûna bi rabirdûyê ye, eşkerekirina heqîqetê ye û avakirina edaletê bêkêmasî ye.”
Tûncer Bakirhan qurbaniyên komkujiya Çorûmê bi rêzdarî bi bîr anî û kujer û mejiyê kujeran bi tundî şermezar kir.
Hevserokê DEM Partiyê destnîşan kir ku wê têkoşîna xwe ya ji bo heqîqet, edalet, welatîbûna wekhev û jiyana hevpar bi biryardarî mezin bikin.
