Hêrsa li hemberî êrişên çeteyên hikumeta demkî yên ku ji aliyê dewleta Tirk a dagirker têne perwerdekirin ve yên li ser taxên Şêxmeqsûd, Eşrefiyê û Benî Zêde zêde dibin.
Di vê çarçoveyê de Kongreya Îslama Demokrtîk, Meclisa Tenduristiyê ya Çilaxa û Meclisa Kongra Star a kantona Firatê daxuyanî dan.
Kongreya Îslama Demokratîk bi amadebûna oldaran daxuyaniyek da. Daxuyanî li pêşiya mizgefta El Fetih a taxa Resafa ya bajarê Çilaxa ji aliyê mele Ednan Resûl ve hat xwendin.
Daxuyaniya Meclisa Tenduristiyê ya bajarê Çilaxa jî li pêşiya avahiya meclisê ya naverasta bajar bi amadebûna endamên meclisê û xebatkarên qada tenduristiyê ve hate dayîn û ji aliyê hevserokê meclisê Newadir Hemê ve hat xwendin.
Meclisa Kongra Star a kantona Firatê jî bi amadebûna nûnerên sazî, rêxistin û desteyên jinan daxuyaniyek li qada Jina Azad a bajarê Kobanê da. Berdevka Kongra Star a Kantona Firatê Luceyîn Salim daxuyanî xwend.
Di daxuyaniyê de komkujiyên ku bi navê îslamê li taxên Şêxmeqsûd û Eşrefiyê hatine kirin hat şermezarkirin û hate gotin, kesên bi navê îslamê sûc û komkujiyan dikin dijminên îslamê ne.
Di daxuyaniyê de berxwedana gelê Şêxmeqsûd û Eşrefiyê û Benî Zêd ya li hemberî êrişên çeteyan hat sivlavkirin û hate diyarkirin ku gel fedaîtî li hemberî teslîmbûnê tercîh kirin û berxwedana wan leheng dê di dîrokê de bimîne.
Di daxuyanyan de îşaret pê hat kirin ku armanc ji van êrişan ku bi plana dewleta Tirk hatiye kirin koçberkirina şêniyan û guhertina demografiya taxan e.
Di daxuyaniyê de bêrêziya li hemberî cenazeyê endama Hêzên Ewlekariya Hundirîn bi binpêkirina rûmeta mirovahiyê sûcekî şer hat binavkirin. Hate diyarkirin ku ev sûc dê jinan ji biryara têkoşîna ji bo azadî û demokrasiyê paşde venegerîne.
Di daxuyaniyan de hate diyarkirin ku hikumeta demkî û alîgirên wê berpirsê siyasî û qanûnî yê van sûcan e û banga hesabpirsînê hat kirin.
