Li bajarê Silêmaniyê ya Başûrê Kurdistanê ji aliyê ‘Platforma Yekîtiya Netewî ya Jinên Kurd-Başûrê Kurdistanê’ komxebat hate lidarxistin. Gelek siyasetmedar, hûnermend, aktivîst û kesên serbixwe tevlî komxebata li salona pirtûkxaneya Tewar hate lidarxistin bûn. Çalakiya du danê sibê saet 10:00’an destpê kir û biryar hate dayîn ku avabûna platformê bi encamnameyeke ji bo raya giştî were ragihandin.
Komxebat ji bo bîranîna hemû şehîdan bi deqîqeyek rêzgirtinê destpê kir. Piştre peyama despêkê ya komxebatê ji aliyê Şeyda Meruf ve hat xwendin. Piştre rapora platformê ji aliyê Sara Reza ve hat pêşkêşkirin. Di raporê de behsa pergala cîhanê ku bi awayek nû li Rojhilata Navîn tê nûkirin û sîstema netew-dewletê hat nirxandin.
Dîwana platformê ku ji Şîrîn Teha, Runak Mecîd û Gulistan Seîd pêk dihat, behsa armanca platformê kirin. Di guftugoyên komxebatê de behsa pirsa jinan, netewa Kurd, yekîtî, yekîtiya jinan û çareserkirina astengiyên heyî û yek parçeyiya Kurdan hate kirin.
Di komxebatê de kesên amade bûn, pêşniyarên xwe pêşkêş kirin. Jinan derbarê rewşa siyasî ya li Başûrê Kurdistanê, guhertinên li herêmê de bang li jinan kirin ku bibin yek. Bi taybetî hat xwestin ku di dema guhertinên Rojhilata Navîn de, jin bedelên mezin didin lewma, divê jin ji bo azadiyê bibin yek.
Her wiha behsa pêvajoya aştiyê ya bi banga Rêber Apo re hatî destpêkirin hate kirin û hat xwestin ku ji bo jin bigihin armancên xwe, hêza xwe bikin yek.
Piştî nirxandin û guftugoyan, komxebat dawî bû. Di dawiyê de biryar hat dayîn ku bi encamnamayek avakirina platforma ‘Yekîtiya Neteweyî ya Jinên Kurd-Başûrê Kurdistanê’ were ragihandin.
