Konfederasyona Civakên Kurdistanê li Elmanyayê (KON-MED), ragihand ku ew ê di 15’ê Sibatê de li Strasbourgê bi daxwaza Rêber Apo ji Îmraliyê bê derxistin û ji bo stratejiyeke aştiyane xebateke azad bê meşandin, wê çalakiyek lidar bixin.
KON-MED’ê di serî de bang li Konseya Ewropa (KE), Neteweyên Yekbûyî (NY) û hikûmeta Elmanyayê kir ku bibînin berxwedana Rêber Apo û gelê Kurd nikare bê rawestandin.
KON-MED’ê, bal kişand ser girîngiya desteka siyaseta navneteweyî ya ji bo daxuyaniya Rêber Apo ya di 23’yê Cotmeha 2024’an de ku digot, “Eger şert û merc bicih werin anîn, hêza min a teorîk û pratîk heye ku vê pêvajoyê ji zemîna pevçûn û şîdetê bikşînin qada hiqûqî û siyasî” ji bo misogerkirina aştiyek mayînde ya li Tirkiyeyê girîng e.
KON-MED’ê, ragihandin ku dewleta Tirk êdî nikare bi rejîma AKP’ê ya bi serkêşiya Erdogan dewam bike û hat destnîşankirin ku vê rejîmê bi taybetî li Sûriye û Iraqê bi polîtîkayên xwe yên “Osmaniya nû” helwesteke êrîşkar nîşan daye û bêaramiya li herêmê kûrtir kiriye. KON-MED’ê, destnîşan kir ku yekane hêza dikare Tirkiyeyê ber bi stratejiyeke aştiyane ve bibe, nexşeya rê ye ku Rêber Apo pêşkêş kiriye.
Di vê çarçoveyê de hate destnîşankirin ku daxwaza wan ew e ku 15’ê Sibatê Rêber Apo ji Girava Îmraliyê bê derxistin û azadiya wî ji bo stratejiyeke aştiyane bê misogerkirine. KON-MED’ê diyar kir ku hikûmeta nû ya Elman wê di Adarê de were avakirin û got divê hikûmeta Elman dev ji polîtîkayên dijî Kurdan ku bi hinceta qedexeya PKK’ê ji sala 1993’yan ve didome, berde.
Di daxuyaniyê de her wiha bal hat kişandin ser hevdîtina Wezîrê Karên Derve yê Elmanyayê bi serokê Hayat Tahrîr El Şam (HTŞ) re ku di lîsteya cîhadîst û terorê de ye û got ku Elmanya çawa dikare di raya giştî de tevgereke ku azadiya jinê diparêze û rast e weke rêxistineke qedexekirî pênase bike?
KON-MED’ê di dawiyê de bang li hemû meclîs, rêveberiyên federasyonê, tevgerên ciwanan û pêkhateyên wê kir ku bi awayekî rêxistinkirî û xurt beşdarî çalakiya ku wê 15’ê Sibatê li Strasbourgê were lidarxistin bibin.
