Li hotêla Dawa ya li bajarê Silêmaniyê dibin pêşengtiya Rêxistina Yesna, li ser nirxandin û pêşkêşkirina çareseriyan ji bo pirsgirêkên ku ciwan pê re rû bi rû dimînin, konferansek tê lidarxistin.
Konferansa Ciwanên Başûrê Kurdistanê bi dirûşmeya ‘Sosyalîzma Demokratîk Bi Ciwanên Rêxistinkirî Dê Bi Ser Bikeve’ û bi deqeyek rêzgirtin ji bo giyanê şehîdên rêya azadî û demokrasiyê destpê kir. Ji bajar û bajarokên Herêma Kurdistanê zêdetirî 100 ciwanan beşdarî konferansê bûne.
Li ser navê ciwanên Başûr, Îman Umêd axaftina vekirinê kir.
Îman Umêd qala dîroka Kurdistanê û çawaniya parçekirina wê ji aliyê dagirkeran ve kir û wiha axivî: “Ji avabûna çar netew-dewletên li herêmê ve, gelê Kurd di qonaxek metirsîdar re derbas dibe, demografiya gelek bajar û herêman guherandine, ciwan û jin têne çewisandin. Lê gelê Kurd li hember vê zilmê teslîm nebûye. Berovajî vê, wan têkoşîn û berxwedana xwe domandin. Niha ew gihîştine qonaxekê ku dikarin çarenûsa xwe bi xwe diyar bikin. Lê li Başûrê Kurdistanê, ji ber bandora dewleta kapîtalîst, pirsgirêkên bingehîn ên wekî jin, ciwan, rêveberî, zîhniyeta desthilatxwaziyê, talankirina binesaziya aborî ya Kurdistanê, pirsgirêkên çîn û aştî û civakî nehatine çareserkirin.”
Îman Umêd destnîşan kir ku pirsgirêkên Rojhilata Navîn dibêjin ku sîstema netew-dewletê û modernîteya kapîtalîst nikarin van pirsgirêkan çareser bikin û wiha domand: “Li çar beşên Kurdistanê, ev sîstem li ser bingeha pirsgirêka çareserkirina mijara Kurd hatiye avakirin. Rêya derketina ji vê alozî û krîzê, hilweşandina vê sîstemê ye. Ger Kurd di nav sînorên xwe de di rewşek bêîstîqrar û bê nasnameyek neteweyî de bijîn, wê demê ewlehî û aştiya ku netew-dewletê lê hatiye parçekirin nayê mîsogerkirin.”
Îman Umêd tekezî kir ku pirsgirêka Kurd ne tenê ya beşekî Kurdistanê ye, pirsgirêkek neteweyî ye ku bi dîrok û şaristaniya neteweya Kurd ve girêdayî ye û got: “Ev pirsgirêk dikare bi rêbazên demokratîk bi netew-dewletên Tirkiye, Îran, Sûriye û Iraqê re bi rêya naskirina mafên neteweya Kurd û jiyana hevbeş a neteweyek demokratîk were çareserkirin. Wek ciwanên Başûrê Kurdistanê, em bawer dikin ku dînamoya vê guhertina dîrokî ciwan û jinin. Niha xwerêxistinkirina sivîl û demokratîk bi şêweyê komên komunal erkê vê qonaxê ye.”
