Endama Partiya Yekîtiya Demokratîk (PYD) û endama Komîteya Koçberên Efrîn û Şehba li Hesekê Hêvîn Reşîd li ser girîngiya lidarxistina konferansê axivî û got, “Di Şoreşa Rojava de jinên Kurd li her qadê pêşengtî kir. Her wiha pêşengtiya jinên Kurd nexşerêyeke nû xêz kiriye. Pênaseya Şoreşa Rojava weke şoreşa jinê ne ji nedîtî ve hatiye û di hemû pêvajoyên giran ên li Sûriyeyê de her tim jinê pêşengî kiriye. Di van demên hesas de ku Sûriye tê re derbas dibe û guhertinên ku di hikumeta Sûriyeyê de rû dane di esasê xwe de tiştek neguhert û gelê Sûriyeyê azad nebû. Sîstem ji sîstem Baasê cûdatir nebû, ji ber sîstem bi heman mejî dimeşe, yek reng, yek al û yek ziman.”
Di dewama axaftina xwe de Hêvîn Reşîd diyar kir ku wê ev konferans bibe zemînek ji bo yekrêziya Kurdî û got, “Ev konferans bi rêya nîqaşên ku tê de dibin û vekirina rêya nîqaşan wê bibe zemînek ji bo yekrêziya Kurdan û çawaniya avakirina aştî û wekheviyê. Bi taybetî jî rola jinên Kurd di yekîtiyê de cihê xwe yê rast girtiye. Mînaka wê jî diyare ku çawa li herêmên Bakur û Rojhilatê Sûriyeyê di hemû çalakî û kar de rola jinê sereke ye û yekîtiya herêmê dide nîşandan. Li aliyekî din jinên ku herêmên wan jî hatine dagirkirin îro di vê konferansê de amade ne, weke jinên Efrîn û Şehbayê. Ev jî hêz û îradeya wan jinan di avakirina yekîtiyê de dide pêş.”
Di dawiya axaftina xwe de Hêvîn Reşîd destnîşan kir ku armanca sereke ya vê konferansê yekitiya hemû jinên Kurd e û got, “Her wiha gelek mijarên ku hatin nîqaşkirin, di nav de rizgarkirina Efrînê û hemû herêmên dagirkirî bûn. Di wan herêman de hêzên tundrew dixwazin her xewna azadî û wekheviyê têk bibin. Pêwîstiya me bi yekîtiya hemû jinan ji hemû herêmên Sûriyeyê heye û heta ku em negihêjin armancên xwe yên azadî em dest ji têkoşînê bernadin.”
Endama Meclîsa Gelan a Bakur û Rojhilatê Sûriyeyê Fatmê Lekto jî konferans li jinan hemûyan pîroz kir û diyar kir ku wê konferans bibe bersiv li hemberî hewldanên qirkirina Kurdan. Fatmê Lekto got, “Di pêvajoyeke weke niha de ku di hundir Sûriyeyê de guhertinên mezin çêbûn, li Bakurê Kurdistanê banga aştiyê ya Rêber Apo hate kirin û peyama Rêber Apo, ji bo wê lidarxistina konferasekê di vê astê û di vê demê de girîng e. Her wiha weke jinên Rojavayê Kurdistanê em ê çawa bibin bersivê pêvajoya heyî, ev jî mijareke konferansê bû. Ev konferans wê bibe bersiv ji bo hemû hêzên ku hewl didin Kurdan tune bikin. Ev konferans dide nîşandan ku jinên Kurd bi hêz û hezkirina xwe û bi helwesta xwe a şoreşgerî û welatparêzî û dengê xwe ji bo paşeroja azad bilind dikin.”
Fatmê Lekto di nav axaftina xwe de diyar kir ku peyama Rêber Apo bû hêz ji bo tevahî jinan û wiha domand, “Di nava Şoreşa Rojava de em jin bûn pêşeng. Barê pêşengtiyê giran em ê bi vê pêşengtiyê jî encamek serfiraz û serketî pêk bînin. Li ser wê esasê em dikarin bêjin ku encama vê şoreşê îro lidarxistina vê konferansê ye. Ev hêza me dibe deng û hêz ji bo hemû jinên Sûriyeyê. Her wiha ev konferans dibe mînakek ji bo hemû jinên Sûriyeyê yên ku heta niha rastî qirkirinê tên.”
Fatmê Lekto anî ziman ku dibe ku hikumeta li Sûriyeyê wek kesayet hatin guhertin, lê mejî heman e û wiha pê de çû, “Dibe ku di sîstema Sûriyeyê de hinek guhertin çêbibin. Lê ew guhertin tenê di asta kesayeta de ma, lê heman mejiyê berê yê yek ol, yek reng û yek netew tê meşandin.”
Di dawiya axaftina xwe de Endama Meclîsa Gelan a Bakur û Rojhilatê Sûriyê Fatmê Lekto got, wê di paşeroja Sûriyeyê de bikaribin destûreke demokratîk ava bikin û got, “Em jinên ku di vê Konferansê de amade, em ê karibin di paşeroja Sûriyeyê de destûreke demokratîk ava bikin, da ku ew destûr bikeve malê hemû gelên Sûriyeyê, ku em tê de gelek rengan ava bikin û hemû gel tê de cih bigirin.”
