Dîwana Hevserokatiyê ya KONGRA-GEL bi peyamekê cejna Remezanê pîroz kir.
Di destpêka peyamê de hate gotin, “Cejna Remezanê li Rêber APO, li gelê Kurdistanê û li alema Îslamê pîroz dikin. Em hêvî dikin ku ev cejn di navbera gelan û baweriyan de bibe wesîleya aştî û aramiyê.”
Peyama KONGRA-GEL bi vî rengî dewam kir:
“Gelê me vê Cejna Remezanê di şert û mercên pir taybet de pêşwazî dike. Banga Rêbertî ya ji bo ‘Aştî û Civaka Demokratîk’ pêşkêş kir, wek ‘Banga Sedsalê’ û ‘Manîfestoya Azadiyê’ hat binavkirin. Li hemû cîhanê deng veda, ji ber ku ji bo pirsgirêkên gelê Kurd û gelên Rojhilata Navîn çareseriyeke mayînde pêşkêş dike. Li ser vî esasî jî dikare li hemû cîhanê ji bo şer û pevçûnên dimeşin jî bibe riya çareseriyê.
Ev meha Remezanê rojeva gelê me jî bi giştî banga Rêbertî bû. Bandora wî li ser çalakî û pîrozbahiyên 8 ê Adarê destpê kir û di Cejna Newrozê de gihîşt asta herî jor. Cejna Newrozê bû Newroza ‘Rêbertiya Azad, Civaka Demokratîk’. Di vê çarçovê de ewil li Rojhilat destpê kir, li hemû parçeyên Kurdistanê, li metropolan û li derveyî welat, gelê Kurdistanê û dostên me bi awayekî bi heybet banga Rêber APO xwedî derketin û azadiya Wî xwestin.
Lê belê ev a yek meh e li ser banga Rêbertî dem derbas dibe, lê ji aliyê desthilatdariya AKP’ê ve tu bersiv nîne. Berevajî ji bo ku rojev bê guhertin, bûyerên wek girtina Ekrem Îmamoglû û derdorên wî plan kirin û pêk anîn.
Pirsgirêka ya herî mezin a ku dest û piyên Tirkiyeyê pê hatiye girêdanê meseleya gelê Kurd e. Çareseriya wê jî bersîvdayîna banga Rêber APO ye. Lê belê ji bo ku li ser vê mijarê bê girtin û rojev bê guhertin, AKP êrişê îradeya gelê Stenbolê ya 16 milyonan dike. Ev jî diyar dike ku çareseri û demokrasî di rojeva Erdogan de nîne. Erdogan niha hewl dide bi zext û zordarî emrê desthilata xwe dirêj bike.
Bersîvdayîna dîrokî ya vê pêvajoyê, girêdayî têkoşîna gelê me û ya hêzên demokrasiyê ye. Rêber APO di banga dîrokî ya ‘Aştî û Civaka Demokratîk’ de, xebatên avakirina ‘Civaka Demokratîk’ wek plansaziyek stratejîk daye pêş qada civakê.
Di ziyaret û pîrozbahiyên Cejna Remezanê de pêwîste rojeva me; li ser bingeha şaxên neteweya demokratîk, em ê civaka demokratik çawa ava bikin? Em ê çawa rejîma AKP’ê mecburî Rêber APO bikin. Em ê çawa hêza xwe û tekoşîna demokrasiyê mezin bikin? Em ê çawa destê Rêber APO xurt bikin?
Rojên Cejna Remezanê ji bo guftugo û bersîvdayina pirsên pêvajoyê, ji gelê me yê welatparêz re derfeteke mezin e. Em wek gel û tevger ketine pêvajoyeke nû. Bi coş û kelecana Newrozê em ê xebatên xwe dewam bikin, li ser vî esasî em ê fîzîkî azadiya Rêber APO pêk bînin.
Di vê çarçovê de em dîsa Cejna Remezanê ya gelê xwe pîroz dikin. Hêvî dikin ev Cejna Remezanê jî wekî Newrozê bibe wesîleya yekîtî û hevgirêdana gelên Kurdistanê.”
