Di daxuyaniya Hevserokatiya KONGRA-GEL de hate gotin, “Em salvegera 41’emîn a Cejna Vejînê di serî de li Rêber Apo li malbatên şehîdan, li gelê me yê welatparêz, li dost û hevrêyên xwe pîroz dikin. Bi vê wesîleyê di şexsê Fermandar Egîd de hevrêyên xwe yên ku Pêngava 15’ê Tebaxê pêk anîn bi hezkirin, hurmet û minet bi bîr tînin.”
Daxuyaniyê bi vî rengî dewam kir:
“Pêngava 15’ê Tebaxê ew pêngav e, ku gelekî bi siyaseta înkar, îmha û asîmîlasyonê, bi polîtîkayên qirkirinê li ber tinebûnê bû, li ser bingeha azadiyê jinûve li jiyanê vegerand. Ji ber vê yekê ji aliyê Tevgera Azadiyê û gelê me ve weke Cejna Vejînê tê pîrozkirin.
Ruhê berxwedana Apoyî yê Mazlûm Dogan, Çaran (Ferhat Kûrtay, Mahmût Zengîn, Eşref Anyik, Necmî Oner) û çalakgerên rojiya mirinê (Mehmet Hayrî Dûrmûş, Kemal Pîr, Akîf Yilmaz û Alî Çîçek) li zindana Amedê li dijî rejîma faşîst a 12’ê Îlonê ya ku dixwest îradeya Têkoşîna Azadiyê bişikîne dan destpêkirin, ji aliyê gerîla ve bi Pêngava 15’ê Tebaxê re li çiyayên Kurdistanê hate belavkirin. Bi ruhê berxwedanê yê Apoyî re agirê azadiyê gihîşt çiyê, pêl bi pêl li çiya, bajar û bajarokên Kurdistanê belav bû.
Pêngava 15’ê Tebaxê ku li her qadên Kurdistanê belav bû, ne tenê pêngaveke leşkerî ye. Di heman demê de li qada civakî û neteweyî hişmendiyeke demokratîk û şoreşgerî afirand. Li gel vê yekê ji aliyê çand, huner û wêjeyê ve jî rê li ber pêşketinên mezin vekir.
Têkoşîna azadiyê ya jinê û artêşbûna jinê ku bi Pêngava 15’ê Tebaxê de bi pêş ve çû, di afirandina şoreşa ji mejiyê civaka demokratîk de bi roleke stratejîk rabû.
Lewma Pêngava 15’ê Tebaxê ku nîşaneya têkoşîna hebûnê ya gelê me ye, li Kurdistanê, Rojhilata Navîn û li qada navneteweyî bingeha destketiyên me hemûyan e.
Asta heyî asta misogerkirina qanûnî ya habûna civakî ya demokratîk a gelê me ye. Ji ber vê yekê di çarçoveya Manîfestoya ku Rêber Apo pêşkêş kir de divê em karên avakirina civaka demokratîk li her qadê bi xurtî bimeşînin.
Ji ber şehadeta fermandarê Akademiyên Apollo Koçero Urfa û fermandarê pêşeng ê Şoreşa Rojava Nûreddîn Sofî û hevalê Bahtiyar Gabar ên bi wesîleya salvegerê şehadeta wan hate ragihandin, em ji malbatên wan ên hêja, gelê me û hevrêyên xwe hemûyan re sersaxiyê dixwazin. Em soza dilsoziya bi bîranîna wan û pêkanîna armancên wan didin.
Cejna Vejînê 15’ê Tebaxê ku hebûna azad a gelê me afirand û kir ku em bigihêjin vê astê, careke din bi coş pîroz dikin û di sala nû ya têkoşînê de serketinê dixwazin.”
