Dîwana Hevserokatiyê ya KONGRA GEL têkildarî êrîşên dagirkeriyê yên dewleta Tirk ên li ser Bakur û Rojhilatê Sûriyeyê daxuyaniyek da û got, “Êrîşa yekser a li hemberî gelê sivîl ê li ser Bendava Tişrînê êrîşeke eşkere ya terorîstî ye ku ji aliyê dewleta Tirk ve hatiye kirin. Ev êrîşên terorîstî bi ti awayî nayên qebûlkirin. Em van êrîşan bi tundî şermezar dikin. Li hemberî van êrîşên terorîstî yên ku cihê xwe di hiqûqa navneteweyî de nîne em bang li saziyên navneteweyî dikin ku bi berpirsyariya xwe rabin.”
YA KU DAÎŞ’Ê DIKIR NIHA DEWLETA TIRK DIKE
Daxuyaniyê bi vî rengî dewam kir, “Ji bo rawestandin û têkbirina êrîşên DAÎŞ’ê gelên Bakur û Rojhilatê Sûriyeyê bi hezaran şehîd dan û mirovahî li dijî vê hovîtiyê parastin. Wê demê raya giştî ya navneteweyî li dijî DAÎŞ’ê rabû ser piyan û wezîfeya xwe ya mirovî bi cih anî bû.
Ya ku doh DAÎŞ’ê dikir, niha dewleta Tirk yekser bi xwe û bi rêya çeteyên xwe yên SMO’yê li dijî gelê Rojava dike. Li hemberî van êrîşên terorîstî yên dewleta Tirk divê raya giştî ya navneteweyî weke wijdanî û exlaqî bi lez helwestê nîşan bide. Bêdengiya li pêşberî van êrîşan wê bibe sedema komkujiyên hîn mezin. Weke ku berê kir divê raya giştî ya navneteweyî bi baldariya xwe ya li ser vê mijarê hêvî û baweriyê bide mirovahiyê.
KES NIKARE VÊ ÎRADEYÊ BIŞIKÎNE
Em sekna bi îrade ya gelên Bakur û Rojhilatê Sûriyeyê ya li dijî êrîşên çeteyên dewleta Tirk bi hurmet silav dikin. Ti hêz nikare vê îradeya berê xwe li jiyaneke azad û bi rûmet têk bibe. Hunermendê gel Bavê Teyar (Cuma Xelîl) ku li Bendava Tişrînê di nobedê de şehîd bû û hemû şehîdên din, em wan hemûyan bi hurmet û minet bi bîr tînin. Pitik Tala ya sêwî ma bû yek ji sembola vê berxwedanê.
PARASTINA ŞOREŞÊ GAVA DESTPÊKÊ YA HILWEŞANDINA FAŞÎZMÊ YE
Banga me li gelê me yê li welat û derveyî welat e:
Berxwedana li Bendava Tişrînê û Pira Qereqozaxê bi qasî berxwedana Kobanê xwedî girîngiyeke stratejîk e. Divê em planên van hêzên ku dixwazin destketiyên gelê me kêm bikin yan jî tine bikin, têk bibin. Parastina destketiyên şoreşa Rojava gava destpêkê ya fermî ya hilweşîna faşîzma dewleta Tirk e. Di çarçoveya pêngava ‘Azadî ji Rêber Apo re, çareserî ji pirsgirêka Kurd re’ bilindkirina têkoşîna azadî û demokrasiyê ye.
Em bang li gelê xwe yê li welat û derveyî welat, bang li dostên xwe yên enternasyonal dikin ku li ser bingeha xwedîderketina li şoreşa Rojava li her qadê seferber bibin. Divê em raya giştî ya navneteweyî bixin nava liv û tevgerê û destpêkê dengê xwe bilind bikin.
Sala 2025’an wê bibe saleke fînalê ku faşîzma dewletê ya dijminê gelê Kurd têk biçe û azadî û demokrasî bi ser bikeve. Bi vê bawerî, coş û kelecanê em bang dikin ku ji bo Rojava seferber bibin.”
