Koordînasyona Kongra Star bi boneya Cejna Zimanê Kurdî daxuyaniyek nivîskî parve kir û diyar kir ku ew ê xwedî li ziman, nasname û têkoşîna jiyana azad derkevin.
Di Koordînasyona Kongra Star de wiha hate gotin:
“Em 15’ê Gulanê, Cejna Zimanê Kurdî, destpêkê li Rêber Apo, ku di nav gelê Kurd de hişmendiya zimanê azad û nasnameya azad geş kir pîroz dikin. Her wiha hemû pêşengên têkoşînê yên ku di vê rêyê de bi dayîna bedelên giran bûn sedema ku ziman û çanda Kurdî heta îro bigihîje, û berxwedanên wan bi rêzdarî silav dikin. Dîsa em Cejna Zimanê Kurdî li hemû jinên Kurd ên ku tevî hemû zehmetiyan, ziman û nasnameya xwe parastin, xwedî derketin û bedel dan pîroz dikin.
Tevî siyaseta înkar, qedexe û asîmîlasyonê ya ku sedsalan li dijî gelê Kurd hate meşandin, gelê Kurd li zimanê xwe xwedî derket û zimanê dayikê bi bedelan gihand vê rojê. Em bi dilsozî û girêdanê; ew kesên ku ji bo Kurdî di zindanan de berxwedan kirin, di rêyên koçberiyê de dayîkên ku zimanê xwe parastin, rewşenbîrên ku bi qelem û keda xwe têkoşîn kirin û bi hezaran şehîdên me yên ku di vê rê de canê xwe dane em bi bîr tînin.
Heke îro Kurdî hîn jî tê axaftin, ev bi saya van bedelên mezin e. Modela jiyana demokratîk a ku li Rojava bilind bûye, ji hemû cîhanê re nîşan daye ku gel dikarin bi ziman û nasnameya xwe ya azad bijîn. Ji ber vê yekê em Cejna Zimanê Kurdî teybetî jî li gelê me yê Rojavayê Kurdistanê teybet jî li jinan û ciwanan pîroz dikin.
Zimanê dayikê rûmet, bîr û hebûna gelekî ye. Civaka ku zimanê xwe winda bike, bi metirsîya windakirina dîrok û nasnameya xwe re rû bi rû dimîne. Ji ber vê yekê parastin, pêşxistin û belavkirina Kurdî di hemû warên jiyanê de erkeke dîrokî ye.
Gelê Kurd ji vir û pê ve jî dê têkoşîna xwe ji bo zimanê dayikê bi hêztir bidomîne. Bikaranîna Kurdî bi awayekî azad di perwerdehiyê de, di dadgehan de, di saziyên fermî de, li kolanan û di hemû warên jiyana rojane de mafê me yê bingehîn e.
Îro heke li Sûriyeyê pêşerojek demokratîk were avakirin, divê ev li ser bingeha wekhevîya gelan be. Nasîna Kurdî wek zimanekî fermî û girtina wê di bin parastina destûrî de mafek e ku êdî nayê paşxistin. Nêrîna yekdest û înkarî ya ku tenê Erebî bingeh digire nayê qebûlkirin. Yekbûna demokratîk tenê bi hebûna azad a hemû gelan bi ziman û nasnameya wan re pêk tê. Ji ber vê yekê nêzîkatiya hikûmeta demkî ya Sûriyeyê ya cudaxwaz, paşxistî û ji nedîtîve tê ya li hemberî zimanê Kurdî nayê qebûlkirin. Em jî bi navê Kongra Starê soz didin gelê xwe ku em ê tu carî nêzîkatiyên înkarî yên li dijî zimanê xwe qebûl nekin. Ev ê bibe yek ji sedemên me yên herî mezin ên têkoşînê. Di vê mijarê de em heta dawiyê li pişt berxwedana mafî ya gelê xwe ne û bi rêzdarî berxwedana wan silav dikin.
Bi ruhê 15’ê Gulanê em careke din dibêjin:
Em ê xwedî li zimanê xwe, nasnameya xwe û têkoşîna jiyana azad derkevin.
Bijî zimanê Kurdî. Bijî berxwedana gelê Kurd.”
