Piştî êrîşa şevê din ya artêşa Iraqê ya li dijî wesayîteke YBŞ’ê heya niha li herêmê rewşeke awarte heye. Heya van kêliyan jî gel li navenda Şengalê di xwepêşandanê de ye û nerazîbûn nîşan dide.
Kordînasyona Hêz û Pêkhateyên Şengalê jî bi daxuyaniyeke çapemeniyê nerazîbûn nîşan da û bang li Iraqê kir ku rêz li hemberî hêzên dijî DAÎŞ’ê şer kirine bigire.
Di daxuyaniyê de wiha hate gotin: ‘‘Weke Kordînasyona Hêz û Pêkhateyên Şengalê,
ji ber geşedanên dawî yên li herêmê bi fikar in. Em bang li hemû aliyan dikin ku demildest rewşê aram bikin û aloziyê rawestînin. Em di wê baweriyê de ne ku rêz li hemberî hemû aliyên li dijî DAÎŞ’ê li ber xwe dane û parastina xwe kirine, bê girtin û dawî li hemû hewldan û zimanê ku van hêzane weke ‘teror’ didin nîşan bê anîn.’’
Di dewama daxuyaniyê de banga diyalogê li her du aliyan hate kirin û wiha hate gotin: ‘‘Her wiha em tekez dikin ku diyalogeke aqilane rêya herî baş ya derbaskirina pirsgirêkane. Em daxwaza qebûlkirina zimanê têgihiştinê û redkirina tundiyê dikin.
Divê çareseriyê ku xizmeta aramiya herêmê û hestên gel bike, were afirandin û berjewendiyên hemû welatiyên Şengalê li ber çavan were girtin. Em di wê baweriyê de ne herdu alî bikarin ev rewşa zehmet derbas bikin û yekîtî û tifaqê pêşbixin.’’
