Parlamenterê Koreya Başûr Lee Seong-kweun piştî brîfînga îstîxbaratê got ku leşkerên Koreya Bakur gav bi gav ber bi Rûsyayê ve têne veguhestin û plan dikin ku di demên pêş de leşkerên nû bişînin.
Rayedarên îstîxbaratê îdîa kir ku ji meha Îlonê ve nêzîkî 5,000 leşker hatine şandin û got ku 10,000 leşkerên din ên Koreya Bakur li deverên nêzîkî sînorê Rûsya-Ukraynayê hatine bicihkirin.
Çavkaniyên Koreya Başûr diyar dikin ku ji dawiya sala 2024’an heta bihara 2025’an de li herêma Kurskê nêzîkî 600 leşkerên Koreya Bakur hatine kuştin û bi hezaran jî birîndar bûne.
Li gorî pisporan, Pyongyang ji berdêla vê piştgiriyê ji Moskowê alîkariya darayî, teknolojiya leşkerî, xwarin û enerjiyê werdigire. Ev hevkarî derfetê dide Koreya Bakur ku ji dorpêçên navneteweyî yên ku ji ber bernameyên wê yên nukleerî û fuzeyan hatine sepandin, xwe rizgar bike.
Wezareta Parastinê ya Koreya Başûr ragihand ku Koreya Bakur saetek beriya serdana Wezîrê Parastinê yê DYE’yê Pete Hegseth ji bo sînorê Koreyê rêze roketên topan avêtine.
Li gorî îstîxbarata Seulê tevî vê yekê jî lîderê Koreya Bakur Kim Jong Un ji diyaloga bi DYE’yê re ”vekirî” ye û plan dike ku dema şert û mercên guncav bibin wê têkeve nav liv û tevgerê.
