Girtiyên siyasî yên li girtîgehên Tirkiyeyê ku tecrîd lê giran dibe, ji ber ku daxwazên herî hêsan ên veguhastinê jî nayên bicihanîn, neçar dimînin çalakiyên grevê pêk bînin. Yek ji van girtiyan kedkarê Grup Yorum Cemîl Kurt bi daxwaza ji Girtîgeha Ewlehiya Bilind a Hejmar 1 a Dumlu ya Erziromê sewqî girtîgehek li Stenbolê ku malbata wî lê ye bibe, 104 roj in di greva birçîbûnê ya bêdem de ye. Bavê Cemîl Kurt Dursun Kurt ji ANF’ê re axivî û da zanîn ku ji ber çalakiyê kurê wî daketiye 39 kîloyan û banga hestiyariyê kir.
‘CEMÎL DAKET 39 KÎLOYAN, REWŞA ALÎŞAN GIRAN DIBE’
Dursun Kurt, diyar kir ku kurê wî ku yek ji kedkarên Grup Yorumê ye di sala 2022’yan de dema ku li dijî qedexekirina konseran ên bi awayekî keyfî pêk dihatin derket, bi awayekî bêhiqûqî hatiye girtin û got, “Di 21’ê Adara 2023’yan de kurê min ji girtîgeha Silîvrî ya hejmar 9 sirgûnî Girtîgeha Ewlehiya Bilind a Hejmar 1 a Dumlu ya Erziromê kirin. Ji wê demê ve jiyana me veguherî zindanê. Ji ber nexweşî û derfeta min a aborî nikarim her tim biçim hevdîtina kurê xwe. Herî dawî di Sibatê de çûm girtîgehê. Girtîgeha Ewlehiya Bilind a Hêjmar 1 a Dumlu ya Erziromê mîna bîraye. Ev ne girtîgeh in ku zarokên me lê tên ragirtine. Hucre mîna qutîkan e. Cihê bêhndanê lê nîne. Pacên wan jî ji dîwaran pêk tê. Kurê min bi hevrêyekî xwe yê bi navê Alîşan Gul re di nava tecrîdê de dimîne. Ew jî bi daxwaza sewqkirinê di greva birçîbûnê ya bêdem-bêdorveger de ye. Herî dawî dema bi kurê xwe re bi telefonê axivîm, got ku ew daketiye 39 kîloyan û rewşa hevalê wî Alîşan giran bûye.”
‘BILA DENGÊ ME BÊ BIHÎSTIN ÊDÎ’
Kurt, anî ziman ku daxwaza sewqkirinê daxwazek ji rêzê ye û dikare were bicihanîn û got, “Zarokên me bi biryar in ku heta daxwazên wan bê bicihanîn, çalakiya xwe bidomînin. Ji bo daxwazên zarokên me yên sewqkirinê pêk were, ma qey divê teqez bimirin. Bila dengê me bê bihîstin êdî.”
