Ciwanên Kurd Serhat, Mahmut Serkan Taş, Ercan Ozmen û S. Taş di 25’ê Tîrmeha 2023’yan de li herêma Navberojan a navçeya Rûbarok a Colemêrgê dema ku pezên xwe diçêrandin, rastî êşkenceya leşkeran hatin. Leşkeran piştî êşkence gule li ciwanan barandin û wan birîndar kirim. Piştre her çar ciwan bi hinceta “binpêkirina qanûna pasaportê” birin dozgeriyê û bi şertê kontrola edlî hatin berdan. Dozgeriyê tevî dîmenên êşkenceyê û raporên lêdanan ên di çapemeniyê de hatine weşandin û serlêdana ciwanan bi hinceta “Sînorên bikaranîna hêzê derbas nekirine û delîlên têrker tinene” biryara neşopandinê da.
BI ÊŞKENCEYA Û HEQARETÊ RE RÛ BI RÛ MAN
Her çar ciwanên ku yek jê hîn zarok bû roja bûyerê ji bo çêrandina pezên xwe derbasî herêma çiyayî bûn. Li wir, pêşî ji aliyê leşkeran ve rastî gulebaran hatin, paşê jî ji aliyê bi dehan leşkerên ku ji qereqolê derketin ve rastî heqaret û êşkenceya fîzîkî hatin. Ciwanên ku gefên kuştinê li wan hat xwarin û bi qûntarên çekan birîndar bûn. Gundiyên ku şahidiya êşkenceyê kirin gihîştin cihê bûyerê û her çar hatin binçavkirin. Tevî nerazîbûna gundiyan jî, ciwan nehatin berdan, heqaret û êşkence li qereqolê jî berdewam kir. Tevî ku her çar ciwan sivîl bûn jî, leşkeran di îfadeya xwe ya dozgeriyê de wan wekî “çar kaçaxên ku hewl didan sînor derbas bikin” bi nav kirin, sê rojan di bin çavan de hiştin. Di vê pêvajoyê de derbarê leşkerên ku êşkence kirine ti tişt nehat kirin.
DOZGERÎ 2 SAL ŞÛNDE LÊPIRSÎN BI ENCAM KIR!
Şaxa Komeleya Mafên Mirovan (ÎHD) ya Colemêrgê û Komîsyona Mafên Zarokan a Baroya Colemêrgê debarê leşkeran de bi sûcdariya “Gelek kesan êşkence, heqaret û gef xwarine” gilî kir. Serdozgeriya Komarê yê Şemzînanê 2 sal şûnde bersiv da. Tevî ewqas dem di ser de derbas bûn jî derbarê leşkeran de ti tişt nekir û bi hinceta “delîlên têrker nînin û leşker sînorê hêza xwe derbas nekirine”, biryara neşopandinê da.
Dozgeriyê di biryara xwe de êşkenceya ku bi dîmenan hatibû piştrastkirin, bi gotina “Di dema girtinê de, kesan li hember leşkerên li ser kar li ber xwe dan û hewl dan ku birevin da ku neyên girtin. Di dema bûyerê de, leşkerên li ser kar ji bo bêbandorkirina kesan hêz bikar anîn û bi fizîkî mudaxeleyî kesên berxwedêr kirin da ku wan di binçav bikin û radestî yekîneyên Jendermeyan bên kirin” leşkeran parast.
ÎFADEYA GUNDIYAN WEKE ‘DELÎL’ NEHAT DÎTIN
Leşkerên ku êşkence li ciwanan kirin îdîa kirin ku gundiyên ku dixwestin wan biparêzin hatine da ku wan lînç bikin, ji ber vê yekê ew çûne qereqolê. Yek ji ciwanên ku bi êşkenceyê hatibû binçavkirin Ercan Ozmen diyar kir ku leşkeran bi eşkereyî êşkence li wan kirin û dozgerî ev yeke weke delîl nehesiband. Beşeke îfadeya wî wiha ye: “Em çûn çêrandina heywanan. Dema ku em vedigeriyan malê, leşkeran li rêya me sekinîn û ji min û hevalên min re gotin ku rawestin. Dema ku leşkeran gotin rawestin, em jî rawestiyan. Piştre bêyî ku bipirsin êrîşî me kirin. Nêzîkî 20 leşkeran li me dan. Ez jî nizanim çima. Wan li pişta min dan. Hemû leşkeran jî bi çekên xwe li lingên min û hevalên min dan. Em hemû birîndar bûn. Min ti kes birîndar nekir. Leşker du qat ji me mezintir bûn. Ne pêkan e ku em li wan bidin. Em çar kes bûn; ew tabûrek leşkeran bûn. Em bi zorê ji destê wan xilas bûn. Ez ji leşkerên ku li min xistin gilîdar im. Wekî ku min di îfadeya xwe de diyar kir ku min ti kes birîndar nekir.”
LEŞKER BÊ CEZA MAN!
Ji bilî îfadeyan, raporên êşkenceyê û şopên êşkenceyê yên li ser laşên wan bi mudaxaleyek ji rêzê ya bijîşkî dikarin bên derbaskirin. Serdozgeriyê tevî delîlan û îfadeya şahidan jî du sal şûnde biryara neşopandinê da.
