Nêzî 10 leşkerên deryayî yên Emerîkî li Baregeha Sherman a berê ku nêzî devê Atlantîkê yê Qenala Panama ye, sîmulasyonên êrîşê kirin. Ev baregeh êdî weke qadeke perwedeyê ya hevpar a polîsên Panamayê û leşkerên Dewletên Yekbûyî yên Emerîkayê (DYE) tê bikaranîn.
Hikumeta Panamayê diyar kiribû ku nêzî 50 leşkerên deryayî wê di navbera 9-29’ê Cotmehê de li herêmên daristanî perwerdeyê bibînin. Ji bo armanca tatbîqatê hate gotin, “Li yek ji deverên herî zehmet ê cîhanê wê kapasîteya ewlekariyê û parastinê bê zêdekirin.”
Rayedarê Panamayî serdar Didier Santamaria îdîa kir ku ev perwerde ji bo “Têkoşîna li dijî sûcê organîzeyî û qaçaxçitiya narkotîkê” hatiye kirin.
Tatbîqat di demeke welê de tê kirin ku di navbera Washington û Caracasê de rageşî heye. Serokdewletê Venezuelayê Nicolas Maduro îdîa dike ku DYE hewl dide wî ji desthilatdariyê bixîne.
DYE’yê ragihand ku 7 keştiyên şer ji Karabîkê, yek jî ji Kendava Meksîkayê re şandiye. Di daxuyaniya fermî de hate îdîakirin ku ev bicihkirin di çarçoveya “Operasyona têkoşîna li dijî qaçaxçitiya narkotîkê” de hatiye kirin.
Albay ê DYE’yî Ada Cotto ragihand ku tatbîqat li dijî Venezuelayê nîne û got, “Her tişt bi zelalî li ser vexwendina hikumeta Panamayê pêk tê.”
Maduro jî diyar kir ku li welatê wî 5 hezar fuzeyên li dijî balafiran ên Igla-S ên Rûs hene û bi gotina, “Her hêza leşkerî bi hêza van çekan zane” bersiv da Washingtonê.
