Tevgerên Jinên Azad (TJA) li Eywana Konferansê ya Tahîr Elçî ya Baroya Amedê bi navê “Mafê hêviyê û azadî israra jinan e” komxebat li dar xist. Cîgira Seroka Baroyê Şîlan Çelîk bal kişand ser pêwîstiya bicîhanîna biryarên Dadgeha Mafên Mirov a Ewropayê (DMME) û guhertinên di zagona înfazê ya Tirkiyeyê de.
Şîlan Çelîk got, “Pêwîst e ti mafên Kurdan li ser maseyê nebin mijara bazariyê. Heke Tirkiye dixwaze di mijara mafê hêviyê de gavê bavêje, divê bêşert û bêmerc gavê bavêje.”
Dayika Aştiyê Hanife Akpolat bal kişand ser binpêkirinên li girtîgehan û banga aştiyê kir. Hanife Akpolat wisa axivî: “Em dixwazin tecrîda li ser malbatan, gel û zindanan rabe. Em naxwazin bên cudakirin, em dixwazin bi xwişk-biratî bijîn.”
Piştî axaftinê, beşdaran gelek caran dirûşma “Bijî Serok Apo” berz kirin.
Hevşaredara Bajarê Mezin a Amedê Serra Bucak jî diyar kir ku divê rêveberiyên xwecihî di pêvajoyên avakirinê de berpirsyariyê bigirin ser xwe. Serra Bucak got: “Di vê pêvajoyê de bi rastî jî weke rêveberiyên xwecihî divê em bizanibin em di kîjan qada avakirinê de ne û divê em mekanîzmayên avakirinê bixin tevgerê. Berpirsyariyeke me ya wisa heye. Bi taybetî ji bo daxwaza azadiyê ya birêz Abdullah Ocalan û girtiyên siyasî, rola me û mîsyona me heye ku em vê daxwazê bi rengekî zêdetir birêxistinkirî bînin ziman û vebêjin.”
Nûnera TÎHV’ê Elîf Turan daxwaz kir ku mafên tenduristî û mirovî bêşert bên bicihanîn û got: “Mirov di warê fizîkî, derûnî û civakî de pirsgirêkên tenduristiyê yên cidî dijîn. Divê mafê hêviyê bêşert bê bicihanîn.”
Hevseroka MED TUHAD-FED’ê Pinar Sakik Tekîn diyar kir ku Rêber Apo vîna bi mîlyonan mirovan e û daxwaza rakirina sîstema cezayê muebeda girankirî kir. Pinar Sakik Tekîn ev bang kir: “Divê sîstema cezayênmuebeda girankirî bê rakirin, biryarên DMME’yê bên bicihanîn, tecrîd bi dawî bibe û mafê hêviyê were mîsogerkirin.”
Hevseroka DBP’ê ya Amedê Rûçem Elyakut anî ziman ku divê mafê hêviyê di qada hiqûqî û siyasî de bê mîsogerkirin. Berdevka Jinan a KESK’ê Çagla Sanay jî got: “Em jin bi mafê hêviyê re dibêjin azadî û em ê vê yekê bidomînin.”
Ji Navenda Mafên Jinan a Baroya Amedê Îrem Îlhan jî got, “Azadiya jinan aştiya civakê û mafê hêviyê yê jinan temsîl dike. Heke aştî tinebe, hêvî jî tineye; heke jin tune bin, hêvî jî tineye.”
Forum bi dirûşmên “Jin, jiyan, azadî” bi dawî bû.
