Li paytexta Awistirya Viyaneyê, bi hezaran Kurdistanî û dostên wan, ji bo protestokirina êrîşên li ser Rojava û mezinkirina piştevaniyê meşekî girseyî li dar xistin.
Meş bi pêşengiya Platforma Parastina Kurdistanê û organîzasyona Dem Kurd, Mala Kobanê, FEYKOM, Komeleya Rojava, MSD, Partiya Pêşverû ya Demokrat a Kurd li Sûriyê (PYD), Tevgera Jin, Navenda Çandê ya Elewî, Kulturzentrum, Shams Organisation, PDK-Iraq, Federasyona Kurdî, Revenda Kurdistanî, PDK-Îran, PJAK û gelek saziyan hate lidarxistin. Girseyê bi cil û bergên xwe yên neteweyî li Heldenplatzê li hev kom bûn û pankartên ku piştgiriyê didin Rojava hilgirtin. Jinan porên xwe kirin kezî û ev peyam dan, “Îradeya jinan tu car nayê şikandin. Jin yek in, hêvî ne û xwedî hêza guhertina cîhanê ne. Felsefeya, ‘Jin, Jiyan, Azadî’ dide jiyîn. Bijî berxwedan û îradeya jinên Kurd.”
Piştî deqîqeyek rêzgirtinê ji bo bîranîna şehîdên şoreşê, axaftin hatin kirin.
Endama Meclîsa Jinan a Avesta Nurcan Guleryuz diyar kir ku berxwedana hêzên xweparastinê yên Rojava û piştevaniya navneteweyî ya ji Kurdistanê heta Ewropayê, peymana ku êrîşên leşkerî yên hikûmeta demkî ya Sûriyeyê ji bo niha dide sekinandin, pêkan kiriye. Guleryuz bilêv kir ku Şoreşa Rojava, şoreşa jinan e û got, “Em ê ji bo mîsogeriya şoreşa jinan, qadan neterikînin.”
Nûnerê Meclîsa Civaka Kurd a Awistiryayê (FEYKOM) jî her kesên ku piştevanî ji bo Kobanê û Rojava dane, silav kir û anî ziman ku bi saya vê piştevaniyê dengê Rojava li cîhanê hate bihîstin.
Ji Koma Piştevaniya Jinan a Awistiryayê Andrea jî wiha got, “Divê tavile dawî li tundiya li ser jinan, bi taybet êrîşên li ser şervanên YPJ’ê bê anîn. Em ê wekî komên jinan ên piştevaniyê yên Awistiryayê têkoşîna xwe ji bo parastina destkeftiyên şoreşa jinan a Rojava bidomînin.”
Meş, li Votivparkê bi dirûşmeyên, “Bijî berxwedana Rojava” û “Yekîtiya gelê Kurd” bi dawî bû. Organîzatoran ragihandin ku ew ê sibê di saet 15:00’an de li Landstraße meşekî nû li dar bixin.
GRAZ
Di roja 10’emîn a meş û çalakiyan e, Kurdistanî û dostên wan li pêşiya Stasyona Trenê ya Navendî (HBF) li hev civiyan. Çalakî bi sirûda Ey Raqîp û deqîqeyek rêzgirtinê ji bo şehîdan destpê kir.
Di çalakiyê de, daxuyanî ji aliyê welatiyên ku ji çar parçeyên Kurdistanê beşdar bûn ve hat kirin. Di daxuyaniyan de hate destnîşankirin ku agibesta demkî ne têrker e û diyarkirin ku ew ê heta naskirina statuya Rojava li qadan bin.
Girseyê di çarçoveya çalakiyê de, di kolanên herî qelebalix ên bajêr de mşeiyan û li pêşiya Rathaus (Şaredarî) daxuyanî dan. Di daxuyaniyan de êrîşên li ser Rojava hatin protestokirin û hate destnîşankirin ku têkoşîna gelê Kurd wê heta azadiya Rojava dewam bike.
Di tevahiya çalakiyê de gelek caran dirûşmeyên, “Bijî berxwedana Rojava”, “Gelê Kurd yek e” û “Bijî berxwedana Kobanê” hatin berzkirin. Organîzatoran, banga tevlîbûnê ji bo meşa ku wê bi wesîleya, 1’ê Sibatê Rojava Kobanê ya Cîhanî were lidarxistin kirin.
WELS
Kurdistanî û dostan wan, li Wels ê Awistiryayê jorîn li dijî êrîş û komkujiyên li Rojava hatin ba hev û meşek li dar xistin. Girseya ku li Rawestgeha Trenê ya Welsê li hev kom bûn, heta qada Wels Hauptplatzê meşiyan. Di tevahiya meşê de dirûşmeyên, “Gele Kurd yek e”, “Bijî Berxwedana Rojava”, “Bijî Berxwedana Kobanê”, “Rojava Rojhilat e, Kurdistan yek welat e” hatin berzkirin.
Di meşê de, jinan porên xwe kirin kezî û di refên pêş de cih girtin.
Piştî meşê, li Wels Hauptplatzê mitîng hate lidarxistin. Siyasetmedat Cevdet Halîm ku li vir axivî, bal kişand ser peyama di rojevê de û destnîşan kir ku ev ji bo Kurdan ne dawî ye, berovajî tê wateya xurtkirina têkoşînê.
Di mitîngê de danezana ku ji aliyê Tevgera Jinên Kurd a Ewropayê (TJK-E) ve hatibû amadekirin, hate xwendin. Di danezanê de hate bi bîr xistin ku Şoreşa Rojava, şoreşa jinan e û hate gotin ku wê têkoşîna azadiyê di pêşengiya jinan de bi biryardarî dewam bike.
