Şerê ku di 28’ê Sibatê de di navbera Emerîka-Îsraîl û Îranê de destpê kir, her diçe li herêm berfirehtir û dijwartir dibe. Herêma Kurdistanê û Iraq jî para xwe ji ziyanên vî şerî girtine. Ji destpêka şer ve bi hinceta baregehên Emerîka yên li nav Herêm û Iraqê, her wiha hêzên çekdar ên nêzî Îranê yên li Iraqê, gelek deverên Herêma Kurdistan û Iraqê têne bombebarankirin. Duh bi şev jî êrîş berdewam bûn.
2 WELATÎ BIRÎNDAR BÛN
Carek din êrîşî çiyayê Korek hate kirin. Li gorî agahiyên bi dest ketine, duh şev carek din sînorê çiyayê Korek hate bombebarankirin. Di nava vê heftiyê de ev cara sêyeme êrîşî çiyayê Korek tê kirin.
Her wiha duh derengiya şevê dronek xwekuj li taxa Westa Receb a ser bi îdareya Soranê ket xwarê. Li gorî agahiyan di encamê de du welatî birîndar bûn.
Duh şev gundên Kewertê ya ser bi bajarokê Çoman û gundê Dergele ya ser bi navçeya Wertê jî hatin bombebarankirin.
Bi dronan şeva borî, bîrên petrolê yên Çemanke yê nêzî gundê Geverkê, li quntarên Çiyayê Gare li sînorê Amêdiyê ser bi parêzgeha Duhokê, hatin bombebarankirin. Piştî êrîşê, şîrketa petrolê ya Emerîka HKN Energy ku li Herêma Kurdistanê kar dike, biryar da ku hemû çalakiyên xwe yên li herêmê rawestîne.
Li gorî çavkaniyên herêmî, şîrketê ji bo parastina jiyana karmendên xwe û ewlehiya alavên xwe yên teknîkî qad vala kir û hilberîna petrolê rawestand.
‘BALAFIREK ŞER A EMERÎKAYÊ LI BESRAYÊ KET XWARÊ’
Şaneya ragihandinê ya ewlehiyê ya Iraqê ragihand ku duh şev dronek dema di navbera parêzgehên Kerkûk û Silêmaniyê de hewl dida saziyekê hedef bigire, hate xistin.
Di daxuyaniyê de hat ragihandin ku saet 22:10’an dema ku dronek hewl dida saziyeke di navbera parêzgehên Kerkûk û Silêmaniyê de hedef bigire, hate xistin. Tîmên taybet gihiştin cihê bûyerê û dron bi zanistî hate desteserkirin û ti zirar çênebû.
Her wiha duh bi şev gote gotên ku balafireke şer a Emerîkayê li parêzgeha Besrayê ketiye xwarê belav bûn. Fermandariya polîsan daxuyaniyek belav kir.
Fermandariyê bêyî ku sedema qezayê diyar bike, ragihand ku tîmên polîsan li pey pîlotê balafirê digerin.
Duh şev yek ji otêlên li navenda Bahreynê ji aliyê Îranê ve hate hedef girtin. Hate ragihandin ku Îranê bi hinceta hebûna Emerîka û Îsraîlê li wir êrîşî otêlê kiriye.
Her wiha balafirên şer ên Emerîka û Îsraîlê duh bi şev baregehên Îranê yên li ser sînorê navbera Başûr û Rojhilatê Kurdistanê nêzî Pîranşarê, bombebaran kirin.
Li gorî agahiyên herêmî, di encama bombebaranê de qurbanî çêbûn û ziyanek mezin gihişte baregehan.
Hêjayî gotinêye ku Berdevkê Hêzên Çekdar ên Xatem-ul-Enbîya Îbrahîm Zulfexarî Îranê di çarçoveya Operasyona ‘Soza Rastîn’ de zêdetirî 2 hezar dronan û 600 mûşek avêtine baregehên Emerîka û Îsraîlê.
