Şaxa Berlînê ya Enstîtuya Kurdî ya Elmanyayê, di çarçoveya Cejna Zimanê Kurdî de pêşengiya bernameya “Desteyek Helbest” kir. Çalakî di 16’ê Gulana 2026’an de li Berlînê, di bin banê Zanîngeha Humboldtê ya Berlînê de saet di 16:00an de dest pê kir û bi tevlîbûneke qelebalîx birêve çû.
Pêşkêşkariya bernameyê Nesîbe Guneylî kir. Di çalakiyê de gelek helbestvan û hunermendên Kurd cih girtin. Di nav beşdaran de Îbrahîmê Xaşxaşî, Aram Zoza, Kurmanc Harikî, Berxwedan Andan, Cemal Xinzor, Bahadîn Akhan, Gulgêş Deryasipî û Erkan Demîrtaş hebûn.
Erkan Demîrtaş du helbestên xwe, yek bi Kurdî û yek bi Elmanî xwendin; Îbrahîmê Xaşxaşî jî bi zaravayê kirmanckî sê helbest pêşkêş kirin. Helbestvanên din jî bi zaravayê kurmancî helbest xwendin. Di dirêjahiya bernameyê de guhdarîkirina helbestan rastî eleqeyeke mezin hat.
Di çarçoveya çalakiyê de Dr. Yadîgar Resûl û Dr. Serwer Abdullah jî li ser girîngiya Cejna Zimanê Kurdî axaftin kirin. Dr. Yadîgar Resûl di axaftina xwe de bal kişand ser dîrok û felsefeya zimanê kurdî; Dr. Serwer Abdullah jî li ser pêşeroja zimanê kurdî nirxandin kirin.
Serwer Abdullah bal kişand ser zextên asîmîlasyonê yên li ser zaravayên cuda yên Kurdî û destnîşan kir ku li gel guhertinên teknolojîk divê ziman were parastin, ji bo vê armancê jî girîngiya zêdekirina xebatên akademîk nîşan da.
Di bernameyê de her wiha Meral Şîmşek, Cengîz Yazgî û Soner Tepelî jî bi performansên xwe yên muzîkê cih girtin.
Çalakî bi pêşkêşkirina gulan ji bo hunermend û helbestvanan bi dawî bû.
