Di dema daxuyaniyê de pankarta bi nivîsa “Hîn çend koçber wê bixeniqin” hate vekirin.
Daxuyanî ji aliyê tora penaberan Yildiz Onen ve hate xwendin û ji bo kesên jiyana xwe ji dest dan banga edaletê hate kirin.
Yildiz Onen anî ziman ku li Derya Spî ji sala 2014’an û vir ve zêdeyî 23 hezar penaberan jiyana xwe ji dest dan û got, “Ev yek ne qeza ye, lê encama polîtîkayên koçberiyê yên Tirkiye û Ewropayê ye.”
Di dewama daxuyaniyê de hate gotin, “Koçber bi salan e ji mafên stargeh, karkirin, perwerde û tenduristiyê bêpar têne hiştin; ji ber ku rêyên qanûnî girtî ne bi cezayê mirinê têne cezakirin. Sîstema ku li şûna parastina mirovan parastina sînoran dike, hilweşiya ye. Em cîhaneke welê dixwazin ku her kes karibin bi rengekî azad lê tevbigerin.”
Di daxuyaniyê de ev daxwaz hatin kirin:
“- Peymana Qebûlkirina Vegerê ya navbera Tirkiye û Ewropayê bila bê betalkirin.
– Ji bo penaberan bila rêyên derbasbûnê yên qanûnî û bi ewle bêne vekirin, vîze bêne hêsanîkirin.
– Astengiya cografî ya ku Tirkiyeyê daniye ser Peymana Cenevre ya 1951’ê bila bê rakirin.
– Li hemberî koçberan dawî li gotinên ‘qaçaxçî, neqanûnî’ bê anîn.
– Dawî li dehfdana vegerê ya li nava deryayê û bejahî bê anîn, karên lêgerîn û rizgarkirinê li gorî mafên mirovan bêne meşandin.
Têkildarî mirinan lêpirsîneke serbixwe bê destpêkirin û berpirsyar bêne eşkerekirin.”
Yildiz Onen di dawiya axaftina xwe de got, “Em dixwazin koçber li jiyaneke bi rûmet û adîl be, ne li nava deryayê bin. Bijî piştevaniya derveyî sînor! Na ji sînoran re. Bila rêyên derbasbûnê yên mirovî û ewle bêne vekirin.”
