Di 2’yê Nîsanê de li bajarê Cenevre ya Swîsreyê, bi pêşengiya jinên Elewî yên Ereb, saziyên Elewî û rêxistinên girseyî yên demokratîk, wê li ber Komîseriya Bilind a Mafên Mirovan a Neteweyên Yekbûyî (UNHCR) li dijî komkujiya Elewiyan çalakiyek bê lidarxistin.
Piştî çalakiyê dê bi rayedarên UNHCR’ê re hevdîtin bê kirin û ji bo rawestandina binpêkirina mafên mirovan û komkujiyan daxwaza gav avêtinek şênber bê kirin.
Çalakî wê bi pêşengiya Koma Xebatê ya Jinan a Dr. Rasha El Elî, Komeleya Çanda Elewî ya Cenevre, Yekîtiya Jinên Elewî yên Demokratîk, Federasyona Elewiyên Ereb a Ewropa, AABK Bawerî, Rê-Lijneya Erkan û Însiyatîfa Mafên Mirovan a Sûriyeyê bê lidar xistin.
Li gorî daxuyaniya komîteya çalakiyê, komên girêdayî HTŞ’ê, DAÎŞ û SMO ya girêdayî Tirkiyeyê li herêmên Laziqiye, Hama, Hums û Tertûsê li dijî Elewiyan êrîşên sîstematîk pêk tînin.
Hate diyarkirin ku bi taybetî piştî ku HTŞ’ê di 8’ê Kanûna 2024’an de li Sûriyeyê hat ser desthilatdariyê, komkujî zêde bûn û hat gotin, “Eger cîhan li hemberî kiryarên li ser jinên Êzidî helwesteke xurt nîşan bidaya, îro Elewî wê heman zilmê nejiyana.”
Di dawiyê de bang li Neteweyên Yekbûyî û rêxistinên mafên mirovan hat kirin ku ji bo rawestandina êrîşên li dijî Elewiyan bikevin nava liv û tevgerê û li dijî rola çeteyên dewleta Tirk a di êrîşan de xwedî helwest bin.
