Şaxa Sendîkaya Kedkarên Zanist û Perwerdeyê (Egîtîm Sen) ya Şirnexê, li hemberî betalkirina cezayê li Bûrak Ercan ê Alîkarê Midûrê Lîseya Pîşeyî ya Cizîrê ku ji ber destdirêjiya li hemberî gelek zarokan tê darizandin, hatiye birîn ‘Nobeda Edaletê’ da destpêkirin. Çalakî li Kolana Hunerê ya Cizîrê hate destpêkirin û li qada nobedê dowîzên bi nivîsa; ‘’Li hemberî destdirêjiya li serzarokan bisekine’’, ‘’Bûrak Ercanî fihêl nekin, bidarizînin’’, ‘’Ji bo Rojîn Kabaîşê edalet’’, ‘’Bêdeng nemîne nebe hevkarê sûcî’’ û pankarta bi nivîsa; ‘’Ne failan zorokan biparêzin, ji bo zarokan edalet’’ hatin vekirin.
Di roja xweya ewil de partiyên siyasî û nûnerên rêxistinên civakî seredana nobedaran kirin û piştgiriyên xwe ragihandin. Hevşaredara Cizîrê Guler Tûnç di seredanê de axivî û got: ‘’Heya roja îroyîn em weke TJA’yê ji eşkerebûna bûyera destdirêjiyê heya niha em dozê dişopînin. Heya roja îroyîn fail bi cezanedanê hate xelatkirin. Kesê ku destdirêjiya zarokên me dike, bi destê dadgehê tê parastin. Ev polîtîka li seranserê Kurdistanê derdikeve pêşiya me. Em baş dizanin ku ev polîtîka bi destê kê tên kirin. Fail hêzên ewlehiyê, kesên ji aliyê pergalê ve tên parastin û memûr in. Em ê heya dawiyê ji bo zarokan daxwaza edaletê bikin. Heya ku fail cezayê heq dikin distînin, em ê têkoşîna xwe bidomînin.’’
Nobed wê heya saet 18.00’an dewam bike.
