Meclisên malbatên şehîdan ên bajarê Dêrik, Amûdê û Tirbespiyê merasîmên veşartina cenazeyên şehîdan li dar xistin.
DÊRIK
Li bajarê Dêrikê Meclisa Malbatên şehîdan merasîma şehîd (Cûdî Doxan) Cîgerxwîn Yûsif Hisên, şervanê Hêzên Rizgarkirina Efrîn (HRE) Şevger Efrîn (Hesen Ebdo) û endamê Hêzên Ewlekariya Hundirîn (Asayîş) Tehsîn Elî, li dar xist.
Bi sedan şêniyên Dêrik, Çilaxa û Girkê Legê tevlî merasîma şehîdan bûn. Merasîm bi deqeyekê rêzgirtinê destpê kir. Piştre ji rêveber Meclisa Malbatên Şehîdan Mihemed Cemîl axivî û bal kişand ser rol û fedakariya şehîdan di şoreşê de û got: “Gel bi saya şehîdan azad û ewle dijîn.”
Her wiha endamê Kongreya Îslama Demokratîk Abduselam axivî û got: “Em niha li vî cihê pîroz ku lehengên me hembêz dike, disekinin. Şehîdan ji bo welat, azadî û rûmeta me canê xwe feda kir. Şehîdan em fêr kirin ku azadî nayê dayîn lê belê tê standin. Bi xwîna xwe dîroka gelê Kurd bi xêzên zêrîn nivîsandin.”
Ji fermandarên QSD’ê Serdar Mêrdîn jî axivî û got: “Em ê her tim ji bo rûmeta gelê Rojava tê bikoşin û nirx û deskeftiyên şehîdan biparêzin. Em soz didin ku rêça şehîdan berdewam bikin û ev berpirsyariyeke ji me hemûyan tê xwestin.”
Di dawiya merasîmê de wesîqeyên şehîdan dan malbatên wan û ew bi dirûşmeya “Şehîd namirin” spartin axê.
AMÛDÊ
Meclisa Malbatên Şehîdan a bajarê Amûdê merasîma şervanan YPJ’ê (Mizgîn Jiyan) Şukran Yildiz li Pakrewangeya Şehîd Hogir Îsmaîl, bi rêxistin kir.
Merasîm bi deqeyekê rêzgirtinê ji bo giyanê şehîdan dest pê kir. Piştî wê bi navê Tevgera Civaka Demokratîk (TEV-DEM) Şîlan Mihemd axivî û got: “Şehîd Mizgîn ji jinên têkoşer re mînak bû. Ji gel û xaka xwe hez dikir. Sînor nas nedikir û jiyana xwe da doza Kurdî û azadiya gelê Kurd. Piştî ku şoreşa Rojava dest pê kir, heval Şîlan tevlî bû. Bi ruhê xwe yê azad, hezkirin û hevaltiya xwe dihat naskirin. Li gelek bajarên Rojavayê Kurdistanê xebitî û di nava gel de dihat hezkirin. Ruhê şoreşê sînoran nas nake. Çîroka şehîd Mizgîn nirxên azadiyê diparêze. Em soz didin ku rêça şehîdan biparêzin.”
Di dawiya merasîmê de wesîqeya şehîd Mizgîn hat xwendin û ew bi dirûşmên ”Şehîd namirin” spartin axê.
TIRBESPIYÊ
Bi sedan şêniyên Tirbespiyê ji bo şervanê QSD’ê Hecî Sîha (Îmad Abdullah) û Xebat Qamişlo (Qanî Osman) ên di 30’ê Adarê de merasîmeke xiyabî jê re hatibû lidarxistin, îro ji hêla Meclisa Malbatên Şehîdan ve li Pakrewangea Şehîd Dilşêr a gundê Dugir merasîm lidar xistin.
Di merasîmê de nûnerên saziyên civaka sivîl, partiyên siyasê û şênî amade bûn. Di merasîmê de bi navê Meclisa Malbatên Şehîdan Asiya Cuma axivî û got, ew deyndarên şehîdan in. Asiyayê diyar kir ew ê her tim xwedî li nirxên şehîdan derkevin got: “Dem dema ku em destê hev bigirin û yekitiya xwe çêkin.”
Ji endamên Meclisa Leşkerî ya Tirbespiyê Çekdar Tirbespiyê jî diyar kir ku ew ê her dem çeka hevalên xwe yên şehîd li erdê nehêlin û rêya wan berdewam bikin û da zanîn ku hêza herî mezin ji gel û malbatên xwe digirin.
Li ser navê malbata şehîd Hecî Sîha apê wî Fener Hisên got: “Şehîd Hecî ne şehîdê malbatê tenê ye, şehîdê Kurd û Kurdistanê ye, xwedîderketina li şehîdan, xwedîderketina li ziman û dîroka me ye.”
Di dawiyê de wesîqeyên her du şehîdan hatin xwendin û radestî malbatên wan kirin.
