Êrişên çeteyên dewleta Tirk, HTŞ û DAÎŞ’ê yên li ser Rojavayê Kurdistanê li bajarê Dêrik ê Mêrdînê ji aliyê Platforma Saziyên Demokratîk ve bi meşekê hatin şermezarkirin. Parlamenterên DEM Partiyê, hevşaredar, endam û rêveberên partiyên siyasî û saziyên sivîl ên civakî di nav de gelek kes tev li meşê bûn.
Girseya ku li ber avahiya postexaneyê kom bû pankartên li ser “Rojava berxwedan e, azadî ye, wijdan e, nikare teslîm bê girtin. Xwedîderketina li Rojava Xwedîderketina li Mirovahiyê ye” û li ser “Jin jiyan azadî” dinivîsî û kezî li ser bûn hilgirtin û dowîzên “Jin jiyan azadî”, “Keziyên me berxwedan e”, “Rojava xeta me ya sor e” û “Rojava rûmeta me ye”, “Kezî têkoşîne, azadî ye, rûmet e”, “Heta em azad nebin hûn rehetiyê nabînin”, “Li Kobanê zarok dicemidin”, “Li Kobanê komkujiya zarokan heye”, “Bi berxwedanê em ê serbikevin”, “Zarokên Kobanê ne bi tenê ne” rakirin. Girseyê li vir dirûşmên “Bijî berxwedana Rojava” , “Rojava Rojhilat e, Kurdistan yek welat e” û “Jin jiyan azadî” berz kirin. Jinan beriya meşê keziyên hev hûnandin. Girse ji ber postaxaneyê heta Qada Azadiyê bi berzkirina dirûşm û sirûdan meşiya.
Piştî ku girse gihişt Qada Azadiyê li vir parlamenterên DEM Partiyê yên Mêrdînê George Aslan û Salîha Aydenîz axivîn.
George Aslan ê ku ewilî axivî, bi lêv kir ku li çar aliyê Kurdistan, Tirkiye û cihanê gelê Kurd li dijî êrîşên ser Rojava li ser piyan e û anî ziman ku di sedsala 21emîn de dîsa xiyanet li gelê Kurd hatiye kirin. George Aslan bal kişand ser banga 27ê Sibatê ya Rêberê Gelê Kurd Abdullah Ocalan û got: “Bi banga 27ê Sibatê ve ji bo lîstikên dewletên emperyalîst vala bê derxistin û aştî bê avakirin ev pêvajo hate destpê kir. Em hemû gelê li çar aliyan dikarin bi hev re bijîn û lîstikên wan pûç bikin. Rêveberên dewletê ji bo aştiyê kar nakin. Şûna ku destê xwe dirêjî kesên aştiyê dixwazin bikin, destên xwe dirêjî kesên ku kurdan qetil dikin, dikin. Em alîgirên aştiyê ne û aştiyê dixwazin. Heta ku ji destên me bên em ê aştiyê biwazin û di nav hewldanê de bin. Bila rayedarên dewletê jî bi vî awayî nêz bibin. Gelê Kurd dê li hemberî emperyalîzmê serî netewîne.” George Aslan bi minasebeta salvegera 11emîn a rizgarkirina Kobanê ji gelê Kobanê re silav şand.
Saliha Aydenîz a pişt re axivî, bi minasebeta salvegera rizgarkirina Kobanê berxwedana gelê Kobanê silav kir û wiha got: “11 sal berê digotin ‘Kobanê ha ket ha dikeve’. Lê Kobanê neket û rizgar bû. Dê rizgariya wê berdewam bike. 11 sal berê gelê Kurd, gelê Kobanê û jinên Kurd li hember çeteyên DAÎŞê li ber xwe dan. Lê dewletên dagirker û navneteweyî ji bo vê carê Kobanê bixin û jinan tune bikin îro bûne yek. Ji bo Kobanê bêstatu bihêlin vê yekê dikin. Çawa ku jin û gelê Kurd wê deme pêşengî kirin dê îro jî pêşengiyê bikin. Kobanê neket û nakeve. Di sedsala 21an de 6 zarok ji sermayê jiyana xwe ji dest dan. Em vê yeke qebûl nakin. Kesên ku çavên xwe ji vê yekê re girtine û bêdeng in hevkarê vê komkujiyê ne. Bi komkujiya kurdan re dixwazin li Rojhilata Navîn şer bimeşînin. Ev fragmana şerê Rojhilata Navîn e. Divê hemû kes vê yeke baş bizanibe. Kesên ku destûrê nadin çavkaniyên jiyanî biçin Kobanê, bila baş bizanibin ku gel bi gelê xwe yê li Kobanê û Rojava re be. Em dibêjin demildest korîdora mirovî vekin. Ger ku hûn kujerên zarokan nînin vê korîdorê vebikin. Îro bi mîlyonan kes li cem gelê Kobanê ne.”
Saliha Aydenîz destnîşan kir ku gelê Kurd li çar aliyê cihanê bûye yek û bi lêv kir ku dirûşma “Yek e yek e yek e, Kurdistan yek e” her deverê belav bûye. Saliha Aydenîz, axaftina xwe bi van gotinan bi dawî kir: “İro hemû kurd bûye yek. Hişê wan li Kobanê û Rojava ye. Em ê yekîtiya xwe xûrttir bikin. Em li Bakûr, Başûr, Rojhilat û Rojava bibin yek. Em bibin yek bibin Kobanê, Rojava, Hesekê, Eşrefiyê. Pêwîste em vê berxwedana xwe mezin bikin. Gelê Kurd îro berxwedan daye pêşiya xwe. Bila bizanibin gelê Kurd bi hezar sal in li ser vê axê jiya ye û wê bijî jî.”
Daxuyanî bi dirûşmên “Bijî berxwedana Rojava” û “Jin jiyan azadî” bi dawî bû. Her wiha ji bo meşa sibê li navçeya Nisêbînê bê lidarxistin jî banga tevlibûnê hate kirin.
