Gerstêrka bi navê K2-18b, di nava Komstêrka Şêr de cih digire û ji ber avaniya xwe ya dişibe okyanûsê, tê texmînkirin ku lê potansiyela jiyana mîkrobîk heye. Lêkolîneran ji bo tespîtkirina nîşaneyên jiyana li vê gerstêrkê Teleskoba James Webb bi kar anîn.
Ekîba ji astronomên Dewletên Yekbûyî yên Emerîkayê (DYE) û Îngilîstanî pêk tê, li atmosfera K2-18b’yê ji bilî xazên metan û karbondîoksîdê ku ji bo jiyanê xazên girîng in, hin kîmyasalên ku li cîhanê ji aliyê zindiyan ve tên hilberandin jî tespît kirine.
Di nava van kîmsayalan de madeyên dîmetîl sulfur û dîmetîl dîsulfur jî cih digirin. Ev made li cîhanê bi taybetî li cihên avî ji aliyê zindiyên mîkroskobîk fîtoplanktonan ve tên hilberandin.
Astrofîzîkzanê ji Zanîngeha Cambridgeyê Nikku Madhusudhan daneyên hatine tespîtkirin nirxand û ev yek anîn ziman: ‘’Tiştên ku me tespît kirine, yekem nîşaneyên girîng in ku îhtimala li gerstêrkeke din jî aktîvîteya bîyolojîk heye radixe ber çavan.’’
Her wiha Madhusudhan diyar kir ku ji bo encameke teqez ev nîşane têrê nakin û divê lêkolînên zêdetir werin kirin.
Gerstêrka K2-18b’yê ne pir dûrî Pergala Rojê ye ne jî zêde nêzîk e ku ev yek jî îhtîmala ku lê jiyan heye xurttir dike. Yanî dibe ku li ser rûyê gerstêrka berbehs av hebe.
Hêjayî bibîrxistinê ye ku Teleskoba James Webb’ê cara ewil di sala 2023’yan tespît kiribû ku li vê gerstêrkê metan û karbondîoksît heye. Daneyên ku di demên dawîn de hatine bidestxistin jî dubare nîşan didin ku divê li ser vê gerstêrkê lêkolînên zêdetir werin kirin.
